اللا تاعالا قىز بالانى تۇرمىسقا شىعىپ, ومىرگە ۇرپاق اكەلۋمەن بىر اۋلەتتىڭ ۇرىم-بۇتاعىن ارى قاراي وسىرىپ-وندىرۋ ۇشىن جاراتقان. كەلىن بولىپ تۇسۋ — ۇلكەن قۋانىش, زور مارتەبە. سونىمەن قاتار, ونىڭ جاس كەلىن موينىنا ارتار مىندەتى دە وڭاي ەمەس. كەلىنگە قايىن اتا مەن قايىن ەنەنىڭ كوڭىلىنەن شىعىپ, ولاردىڭ قاس-قاباعىن باعۋدى بىلاي قويعاننىڭ وزىندە, توڭىرەگىندەگى ابىسىندارىمەن تىل تابىسىپ, اۋىل ۇي مەن اعايىن اراسىنىڭ جاراسىمدىلىعىنا, ارالاس-قۇرالاس, تا-تۋتاتتى تىرشىلىك ەتۋىنە ۇيىتقى بولۋ مىندەتى جۇكتەلگەن. سول سەبەپتەن دە اتا-بابالارىمىز كەلىندى وز ۇرپاعىن وربىتىپ-وركەندەتىپ وسىرۋشى ارى ورىسىن كەڭەيتۋشى جان رەتىندە باعالاپ, ونى ىرىسىم, قۇت-بەرەكەم دەپ قۇرمەتتەگەن. كەلىن ۇشىن قايىن ەنە تالىمى — ۇلكەن تاربيە مەكتەبى. كەلىننىڭ «كەلساپ» بولماي, ەلگەزەك , جاقسى ادام بولىپ قالىپتاسۋى, ەڭ الدىمەن, ونىڭ ەرىنە دەگەن قادىر-قۇرمەتىنە, ەكىنشىدەن, قايىن ەنەنىڭ تالىم-تاربيەسىنەن بايلانىستى. ويتكەنى, ەنە — كەلىننىڭ ەكىنشى اناسى. ال, قايىن ەنە ۇشىن وزەگىن جارىپ شىققان ۇلىنىڭ جارى — ول دا وز بالاسى. كەلىننىڭ ەنەدەن ۇيرەنەرى كوپ. بۇگىنگى كەلىن — ەرتەڭگى ەنە. كەلەشەكتە ول ەنەسىنەن ۇيرەنگەنىن وز كەلىنىنە ۇيرەتەدى. داستۇرلى تاربيە مەكتەبى وسىلايشا جالعاسىپ كەتە بەرەدى. بۇل — ناعىز حالىقتىق پەداگوگيكا, ياعني, عاسىرلار بويى قالىپتاسىپ, بۇلجىماي ورىندالىپ كەلە جاتقان جازىلماعان ومىر زاڭدىلىعى, تىرشىلىك ساباقتاستىعى. كەلىننىڭ ەكىنشى بىر سىنعا تۇسەتىن ورتاسى — ابىسىن-اجىن اراسى. اۋىلدىڭ, اۋلەتتىڭ اۋىزبىرلىگى مەن ىنتىماقتاستىعى, ايرانداي ۇيىعان تاتۋ-تاتتى تىرشىلىگى, نەگىزىنەن, وسى ابىسىندارعا تىكەلەي قاتىستى. بىرگە تۋعان اعايىندى وتاعاسىلاردىڭ ايەلدەرى بىر-بىرىنە ابىسىن-اجىن بولىپ كەلەدى (ابىسىن — ۇلكەن كەلىن, اجىن — كىشى كەلىن). اتالارىمىزدىڭ «اعايىن تاتۋ بولسا — ات كوپ, ابىسىن تاتۋ بولسا — اس كوپ» دەۋىندە ۇلكەن تاربيەلىك مان بار. اۋلەتكە, اعايىن-تۋعانعا, بارشا اۋىلعا قادىرى ارتقان كەلىن اتانۋ ۇشىن, اربىر ايەل زاتى تامىرى تەرەڭدە جاتقان حالىقتىق تالىم-تاربيە, ۇلگى-ونەگە قاينارىنان سۋسىنداپ, شولىن قاندىرىپ وتىرعانى جون.

س. سۇلتانوۆا