استانادا قازاق ادەبيەتىنىڭ ۇلى كلاسسيگى, اقىن جانە اعارتۋشى اباي قۇنانبايۇلىنىڭ 180 جىلدىعىنا ارنالعان ەرەكشە مۋزىكالىق كەش وتتى. «استانا وپەرا» تەاترىندا وتكەن «ۇيىقتاپ جاتقان جۇرەكتى ان وياتار» اتتى كونتسەرتكە كلاسسيكالىق مۋزىكا مەن پوەزييانى سۇيەتىندەر جينالدى, دەپ حابارلايدى Shalqar.kz تىلشىسى سىرتقى ىستەر مينيسترلىگىنە سىلتەمە جاساپ.

بۇل كەشتىڭ باستى ەرەكشەلىگى – ايگىلى كومپوزيتور ەركەعالي راحماديەۆتىڭ اباي ولەڭدەرىنە جازىلعان رومانس توپتاماسىنىڭ العاش رەت ورىندالۋى بولدى. كورەرمەندەرگە «قالىڭ ەلىم, قازاعىم, قايران جۇرتىم», «جازدىگۇن شىلدە بولعاندا», «كوڭىلىم قايتتى دوستان دا, دۇشپاننان دا…», «قاجىماس دوس حالىقتا جوق», «سىز – قىرعاۋىل جەز قانات», «قارا قاتىن» جانە «كوڭىل قۇسى قۇيقىلجىر شارتاراپقا…» سىندى تۋىندىلار ۇسىنىلدى.

سونداي-اق, كونتسەرت باعدارلاماسىنا «مەن سالەم جازامىن», «عاشىقتىڭ تىلى – تىلسىز تىل», «كەيدە ەسەر كوڭىل قۇرعىرىڭ», «عاشىقتىق, قۇمارلىقپەن – ول ەكى جول» اتتى رومانستار جانە احمەت جۇبانوۆ پەن لاتيف حاميديدىڭ «اباي» وپەراسىنان ارييالار ەنگىزىلدى. سونىمەن قاتار, سىدىق مۇحامەدجانوۆ, مانسۇر ساعاتوۆ جانە ەۆگەنيي برۋسيلوۆسكيي سىندى كومپوزيتورلاردىڭ اقىن سوزىنە جازىلعان اندەرى شىرقالدى.

بۇل كونتسەرت ابايدىڭ 180 جىلدىعىنا ارنالعان ىس-شارالاردىڭ باستاماسى بولدى. كۇزدە كورەرمەندەر اقىننىڭ سوزىنە جازىلعان باسقا دا كومپوزيتورلاردىڭ شىعارمالارىنان قۇرالعان كونتسەرتتى تاماشالاي الادى.

ايتا كەتەيىك, «استانا وپەرا» تەاترىندا اباي مۇراسىن ارقاۋ ەتكەن سپەكتاكلьدەر تۇراقتى تۇردە قويىلادى. تەاتر رەپەرتۋارىنداعى ايتۋلى تۋىندىلاردىڭ بىرى – مۇحتار اۋەزوۆتىڭ ليبرەتتوسىنا نەگىزدەلگەن احمەت جۇبانوۆ پەن لاتيف حاميديدىڭ «اباي» وپەراسى. بۇل قويىلىم 2015 جىلى تەاتردىڭ ۇلكەن زالىندا العاش رەت ساحنالانىپ, 2018 جىلى قازاقستان رەسپۋبليكاسىنىڭ مەملەكەتتىك سىيلىعىنا يە بولعان ەدى.