اتىراۋ وبلىسىندا كۇننىڭ كۇرت جىلىنۋىنان يندەربور كەنتىنىڭ “بولاشاق” ىقشام اۋدانىندا قار سۋى جايىلىپ, جەرگىلىكتى تۇرعىنداردى ابىگەرگە سالدى, دەپ حابارلايدى Shalqar.kz.

كوكتەمنىڭ العاشقى كۇندەرىندە قار مول تۇسىپ, ارتىنشا جىلدام ەرىپ كەتكەن. “اياق باسار جەر جوق, كوشەلەر كىشىگىرىم سۋ ايدىنىنا اينالدى. سۋ ۇيلەرگە جاقىنداپ, قاۋىپ توندىردى. تۇرعىندار وز باسپانالارىن قورعاۋ ۇشىن بىرىگىپ جۇمىس ىستەدى. اۋدان باسشىلارى دا تەحنيكالارىمەن بىرگە كۇن-تۇن دەمەي وسىندا بولدى”, – دەيدى جەرگىلىكتى حالىق.

توتەنشە جاعدايدى باقىلاۋعا الۋ ۇشىن قار سۋىن بۇرۋ جانە سورۋ جۇمىستارىنا ۇش ارنايى تەحنيكا, سەگىز موتوپومپا جانە 20 جۇمىسشى جۇمىلدىرىلدى.

“بۇل ايماقتا قاردىڭ كوپ جينالۋى جىل سايىن قايتالاناتىن جاعداي. بيىل كوكتەم ەرتە كەلدى, سوندىقتان نەگىزگى كۇش وسى ىقشام اۋدانعا باعىتتالدى. قازىرگى تاڭدا سۋ بىرتىندەپ سارقىلىپ, جاعداي تۇراقتانىپ كەلەدى”, – دەپ مالىمدەدى كەنت اكىمى شالقار المۋرزيەۆ.

ايتا كەتەيىك, بۇل ىقشام اۋداندا 2023 جىلدان بەرى جول سالۋ جۇمىستارى جۇرگىزىلىپ جاتىر.

بۇعان دەيىن ەكولوگييا جانە تابيعي رەسۋرستار مينيسترى ەرلان نىسانباەۆ ۇكىمەت وتىرىسىندا سۋ تاسقىنى قاۋپى جوعارى وڭىرلەردىڭ جاڭارتىلعان تىزىمىن جارييالاعان بولاتىن.