18 ناۋرىز – قازاقتىڭ ۇلتتىق كيىمىنىڭ اسەمدىگى مەن تەرەڭ ماعىناسىن دارىپتەيتىن ەرەكشە كۇن. عاسىرلار بويى ۇلتتىق كيىم تەك سان ۇشىن ەمەس, سونىمەن قاتار يەسىنىڭ مارتەبەسى مەن رۋحاني قۇندىلىقتارىن ايقىندايتىن ەرەكشە بەلگى بولدى, دەپ حابارلايدى Shalqar.kz.

قازاقتىڭ ۇلتتىق كيىمى تابيعاتپەن ۇندەستىكتە جاسالعان – بىلعارى, جۇن, كيىز, ماتا سيياقتى ماتەريالدار جىلۋلىق پەن جايلىلىق سىيلاپ قانا قويماي, حالىقتىڭ ومىر سالتى مەن داستۇرىن بەينەلەگەن. كيىمگە قولدانىلاتىن اسىل تاستار مەن مەتالدار ادامنىڭ الەۋمەتتىك دارەجەسىن كورسەتكەن.

بۇگىندە ۇلتتىق كيىم داستۇر مەن زاماناۋي سان ۇردىستەرىنىڭ ۇيلەسىمدىلىگى ارقاسىندا جاڭا قىرىنان تانىلۋدا. ۇلتتىق ناقىشتاعى كيىمدەر كۇندەلىكتى سانگە ەنىپ, جاستاردىڭ قىزىعۋشىلىعىن ارتتىرىپ كەلەدى. بۇل – ۇلتتىق مادەنيەتتىڭ جاندانۋىنا جانە ونى كەلەر ۇرپاققا جەتكىزۋگە جاسالعان ۇلكەن قادام.

ۇلتتىق كيىم كۇنى – اربىر ازاماتقا وز بىرەگەيلىگىن كورسەتۋگە, قازاق مادەنيەتىنىڭ بايلىعىن دارىپتەۋگە مۇمكىندىك بەرەدى. بۇل كۇندى اتاپ وتۋ ارقىلى بىز داستۇرگە دەگەن قۇرمەتىمىزدى كورسەتىپ, ۇلتتىق بىرەگەيلىگىمىزدى نىعايتا تۇسەمىز.