2024 جىلى Air Astana اۋەكومپانيياسى ەرەكشە ناتيجەلەرگە قول جەتكىزىپ, 9 ميلليون جولاۋشى تاسىمالداپ, قارجى تابىسىن 1,3 ميلليارد دوللارعا جەتكىزدى. سونىمەن قاتار كومپانييا مەرزىمىنەن بۇرىن ديۆيدەندتەر تولەۋ تۋرالى ۇسىنىس جاسادى. بىز Air Astana-نىڭ جىلدىق قورىتىندىسىن تالقىلاپ, 2025 جىلى قانداي جاڭالىقتار كۇتەتىنى تۋرالى مالىمەت الدىق, دەپ حابارلايدى Shalqar.kz.

جاڭا ۇشاقتار مەن قىزمەت ساپاسى

2024 جىلدا Air Astana جانە ونىڭ ەنشىلەس كومپانيياسى FlyArystan اۋەكومپانيياسى قىزمەتىنە سۇرانىس ايتارلىقتاي ارتتى. بىلتىرعىدان 1 ميلليون جولاۋشى كوپ تاسىمالداندى. اۋەكومپانييا وز ۇشاقتارىنىڭ سانىن كوبەيتىپ, جالپى 57 ۇشاققا يە بولدى. بۇل قادام كومپانييانىڭ باسەكەگە قابىلەتتىلىگىن ارتتىرۋعا جانە قىزمەت كورسەتۋ ساپاسىن جاقسارتۋعا باعىتتالعان.

Air Astana باس ديرەكتورى پيتەر فوستەر: “قازىرگى تاڭدا بىز كليەنتتەرىمىزگە جوعارى ساپالى قىزمەت كورسەتۋدى باستى ماقسات ەتىپ وتىرمىز. بىز وزىمىزدىڭ بيزنەس زالىمىزدى, سايتتارىمىزدى جانە باعدارلامالاردى جاڭارتىپ, جولاۋشىلارىمىز ۇشىن ىڭعايلى قىزمەت ۇسىنۋعا تىرىسامىز”, – دەيدى.

قارجى كورسەتكىشتەرى

كومپانييانىڭ 2024 جىلعى كىرىسى 1,3 ميلليارد دوللاردى قۇرادى, بۇل وتكەن جىلمەن سالىستىرعاندا 12,4%-عا ارتتى. بۇل وسىم, اسىرەسە, ازييا جانە پارسى شىعاناعىنا باعىتتالعان رەيستەردىڭ كەڭەيۋىنە بايلانىستى قول جەتكىزىلدى.

كومپانييانىڭ ديرەكتورلار كەڭەسى اكتسيونەرلەرگە 19,1 ميلليارد تەڭگە كولەمىندە ديۆيدەندتەر تولەۋدى ۇسىندى. بۇل تولەمدەر 2025 جىلدىڭ ورتاسىنا دەيىن بەرىلەدى.

Air Astana-نىڭ جاڭا باعىتتارى مەن بولاشاعى

2024 جىلى Air Astana 22 جاڭا حالىقارالىق باعىت اشىپ, 21 جاڭا مارشرۋت قوستى. اۋەكومپانييا ۇندىستان, قىتاي, ۆьەتنام جانە پارسى شىعاناعى ەلدەرىنە رەيستەردى كەڭەيتتى. ال 2026 جىلدان باستاپ الماتى-توكيو باعىتى اشىلادى.

Air Astana سونىمەن قاتار قىتايلىق China Southern Airlines اۋەكومپانيياسىمەن كود-شەرينگ كەلىسىمىن جاساسىپ, حالىقارالىق بايلانىستاردى كۇشەيتتى.

اۋەكومپانييانىڭ جاڭا جوبالارى

Air Astana 2024 جىلى جاڭا Air Astana Terminal Services كومپانيياسىن قۇرىپ, جەردەگى قىزمەت كورسەتۋ سالاسىندا دا وز اسەرىن ارتتىرۋدى كوزدەيدى. بۇل كومپانييا جازدا جۇمىسىن باستايدى جانە استانا مەن الماتىداعى باسقا اۋەكومپانييالارىنا دا قىزمەت كورسەتۋ مۇمكىندىگىنە يە بولادى.