logo
burger menu search Қазақша language menu
Жолсапар

Автор: ADMIN

Жолсапар 2026-06-09 18:29:00

Біз әлеуметтік желілерде:

ОДЕССАҒА ЖЕТІ КҮН ҚҰДІРЕТТІ ӨНЕРІН СЫЙЛАҒАН АЛМАТЫ

news single

   2007 жылдың «Қазақстанның Украинадағы жылы» деп бекітілгені баршамызға аян. Украина мемлекетінің басшысы Виктор Ющенко да өз кезегінде: «Украинада Қазақстан жылын өткізудегі басты мақсаттардың бірі – бүгінгі Қазақстанның экономикалық-әлеуметтік жетістіктерімен және халықтың өмірімен жақынырақ, жан-жақты таныстыру», – екендігін мәлімдеген болатын. Бүгінде екі мемлекет арасындағы сауда-экономикалық, әсіресе мәдени қарым-қатынастар өрістей түсуде. Соның бір жарқын дәлелі – қазан айында Украинаның Одесса қаласында өткен Алматының мәдениет күндері. Мәдени шаһар Алматыдан 150-ге тарта өнерпаздар мен мәдениет өкілдерін, журналистерді мінгізген «Ил» әуе кемесі бес жарым сағатта Қара теңіз жағалауындағы тарихи қала – Одесса әуежайына келіп қонды. Ұқсас тағдырлар мен ортақ құндылықтар Миллионнан астам тұрғыны бар Одесса – Алматы сияқты өз еліндегі ең көрікті, мәдениет пен өнер ордасы саналатын қала. Мұнда да жүзден астам ұлттың өкілі тату-тәтті ғұмыр кешіп жатыр. Өзінің екі жүз жылдық тарихы бар бұл шаһар ең алдымен қонақжайлылығымен ерекшеленеді.

 

   Әзіл мен қалжыңның отаны атанған Одессада:

• 100-ге жуық мұражай мен түрлі галереялар;

• 40-қа тарта кітапхана;

• 6 театр мен атақты киностудия бар.

 

  Шаһарда А. Пушкин, И. Айвазовский, Д. Менделеев, И. Бабель, А. Чехов, А. Ахматова сынды біртуар тұлғалардың ізі қалған. Біз Алматыдағы «Медеу» мен «Шымбұлақты» мақтан тұтсақ, одессалықтар 1837 жылы салынған, биіктігі 27 метр, ал ұзындығы 136,47 метрді құрайтын әйгілі Потемкин баспалдағын ерекше қастерлейді. Сондай-ақ тас кірпішпен көмкерілген, тек жаяу жүргіншілерге арналған атақты Дерибасовская көшесі де – қаланың бойтұмары. «Алматыдан сүйіспеншілікпен» Ресми делегацияны Алматы қаласының әкімі Иманғали Тасмағамбетов бастап барды. Мәдениет күндерінің шымылдығы Әдебиет мұражайында ашылған «Алматы – аспан таулары аясындағы қала» атты фотосуреттер мен қылқалам шеберлерінің көрмесімен басталды.

 

    Ал ресми ашылу салтанаты 1884 жылы салынған, сәулеті мен акустикасы жағынан Еуропадағы ең үздік екі театрдың бірі саналатын Одессаның ұлттық опера және балет театрында өтті. Хан сарайындай құлпырған өнер ордасында Алматы әкімі Иманғали Нұрғалиұлы жүрекжарды лебізін білдірді: «Мемлекеттеріміз арасында ежелден қалыптасқан достық пен әріптестік қатынастар тереңдей түсуде. Бұл шара халықтарымыз арасындағы рухани байланысты одан әрі жетілдіріп, қазақтың ұлттық өнері украиндықтарды мол қуанышқа бөлейтініне сенімдімін», – деп кешті ашып берді. Осыдан кейін театр шаңырағында қазақтың төл өнері күмбірлей жөнелді. Ұлттық киім киген қазақ қыздарының залдағы көрермендерге Алматының әйгілі апорт алмасын таратуы кештің ең әсерлі сәтіне айналды. Жұпар иісі аңқыған қып-қызыл апорттан ауыз тиюге жиналған жұрт ерекше ықылас танытты. Кеште «Жетіген» тобының, Дәлел Уашевтің, Болат Құсайынов пен Болат Бөкеновтің украин тілінде шырқаған әндері, Абдулхамит Райымбергенов, Айгүл Батырхайырова, Асылбек Еңсеповтің күмбірлеген күйлері, Талғат Мұқышевтің сызылтқан сыбызғысы көрерменді баурап алды.

 

    Ал белгілі опера әншілері Сұлтан Байсұлтанов, Сара Найман, Жәмила Жарқынбаева, Аида Часовитина, скрипкашы Аида Аюпова және балет шебері Досжан Табылды мен Нәйла Кребаеваның өнеріне талғампаз Одесса жұртшылығы «Браво!» деп ұзақ қол соқты.

 

 

 Кино өнері мен әдебиет кеші

 

  Жеті күн бойы қаланың түкпір-түкпірінде мәдени шаралар толастамады:

• «Сазген сазы» ансамблі В. Васылько атындағы украин музыкалық-драма театрында «Мәңгілік сарын» атты дәстүрлі музыка кешін өткізді.

 

• «Самрұқ» заманауи балет театры Орыс драма театрында өнер көрсетті.

• Облыстық филармония залында Қазақстанның халық әртісі Төлепберген Әбдірашевтің дирижерлік етуімен симфониялық оркестрдің концерті өтті. Одессаның «Маски» кинотеатрында көрсетілген Дәмір Манабайдың «Кек» және Гүлшад Омарованың «Шиза» фильмдері көрерменнің жоғары бағасын алды.

 

   Шарадан кейін кинотеатрдың арт-директоры Ян Юсим қазақ киносының тереңдігіне тәнті болып, келер жылы Одессада қазақ киносының фестивалін өткізуге уәде берді. Сапар аясында әлемдік деңгейдегі ақын Олжас Сүлейменовпен өткен шығармашылық кездесудің орны бөлек болды. Ақынның поэзиясына табынушы халық залды толтырып, кездесу жоғары деңгейде өтті. Театр басшысы Александр Копайгора бұл жүздесудің өзі үшін үлкен арман болғанын жеткізді. 

 

   Қара теңіз жағасындағы қимастық

 

   Журналистер тобы Одесса портының бастығы Николай Маковецкиймен танысты. Ол кезінде Қазақстанда 10 жыл тұрып, қызмет еткен екен: «Кең пейіл қазақ даласын, олардың дархандығын ұмыту мүмкін емес. Алматы мен үшін пейіш қала сияқты», – деп ағынан жарылды және делегацияға «Порт және Одесса» атты тарихи кітапты тарту етті. 14 қазан күні М. Водяной атындағы академиялық музыкалық комедия театрында мәдениет күндерінің жабылу салтанаты өтті. Кешті Дана Нұржігіт пен Шалқар Үркімбаев жоғары деңгейде жүргізсе, Дәлел Уашевтің орындауындағы «Атамекен» әні залдағы барша отандастарымызды тебірентті. Одесса облыстық мемлекеттік әкімшілігі төрағасының орынбасары Андрей Ткачук: «Сіздер мәдени күндер өткізудің деңгейін тым жоғары көтеріп жібердіңіздер. Біз сіздерге «қош» демейміз, «до зустричи» – кездескенше дейміз!» – деп баға берді. Келер 2008 жыл «Украинаның Қазақстандағы жылы» болмақ. Қазақстанның Украина мен Молдовадағы Төтенше және Өкілетті Елшісі Амангелді Жұмабаев та өнерпаздардың миссиясын сәтті аяқтағанын атап өтті. P.S. Одессадан келген хат Мақала әзірленіп жатқанда Одессаның бас басылымы «Юг» газетінен біздің редакцияға хат келді. Газет өз бетінде «Семь дней, которые потрясли одесситов» және қазақша «Келесі кездескенше – Алматы!» деген тақырыппен үлкен мақала жариялап, Алматы мәдениет күндеріне екі бетін тұтас арнапты. Мақала авторы, украиндық журналист Елена Марценюк өз хатында былай деп жазады: «Қымбатты Жазира! Біз әлі де Алматының мәдениеті мен өнеріне деген таңданысымыздан арыла алмай жүрміз. Біз сіздердің өнерлеріңізге тәнті болдық және өнерге деген халықтың, мемлекеттің қамқорлығына қызыға да, қызғана да қараймыз...»

 

  Бұл хатты оқығаннан кейін, ұлы дала әуенін, ұлттық өнерімізді әлемдік деңгейде жиі насихаттап тұрсақ, қазақ мәдениеті кез келген ұлтты таңқалдыра алатынына тағы бір мәрте көз жеткіздік.

 

    Өнер мен мәдениет – халықтар арасындағы алтын көпір.

 

    Ендеше, осындай рухани табыстарымыз көп болғай! _

 

   Жазира АМАНТАЙҚЫЗЫ

 

   Алматы – Одесса – Алматы

 

     2007 жыл

Басқалармен бөлісе отырыңыз
Пікірлер

Басты жаңалықтар

img
Дерек пен дәйек 2026-06-08

Шыңжаң Түйекиігі
img
Жолсапар 2026-06-09

Қиыр мекен, кенді түбекте өткен дәстүрлі мәдениет көші
img
Дерек пен дәйек 2026-06-08

АТТАН ЖЫҒЫЛСАҚ ТА, ЖЕР ТАНЫМАДЫҚ-АУ!!!
news-img
overlay bottom
Дерек пен дәйек 2026-06-08
АТТАН ЖЫҒЫЛСАҚ ТА, ЖЕР ТАНЫМАДЫҚ-АУ!!!

Последние новости

img
Жолсапар 2026-06-09

Қиыр мекен, кенді түбекте өткен дәстүрлі мәдениет көші
img
Жолсапар 2026-06-09

ОДЕССАҒА ЖЕТІ КҮН ҚҰДІРЕТТІ ӨНЕРІН СЫЙЛАҒАН АЛМАТЫ
img
"Шалқар" газетіне 50 жыл! 2026-06-08

ТАНЫС ТА БЕЙТАНЫС БЕЙЖІҢ

Все новости

news-img
overlay bottom
Жолсапар 2026-06-09
Қиыр мекен, кенді түбекте өткен дәстүрлі мәдениет көші
news-img
overlay bottom
Жолсапар 2026-06-09
ОДЕССАҒА ЖЕТІ КҮН ҚҰДІРЕТТІ ӨНЕРІН СЫЙЛАҒАН АЛМАТЫ
news-img
overlay bottom
"Шалқар" газетіне 50 жыл! 2026-06-08
ТАНЫС ТА БЕЙТАНЫС БЕЙЖІҢ
news-img
overlay bottom
Дерек пен дәйек 2026-06-08
АТТАН ЖЫҒЫЛСАҚ ТА, ЖЕР ТАНЫМАДЫҚ-АУ!!!
news-img
overlay bottom
Дерек пен дәйек 2026-06-08
АТА ЖАЗУ АЛЫСТАН СЫР ҚОЗҒАЙДЫ
news-img
overlay bottom
Дерек пен дәйек 2026-06-08
Шыңжаң Түйекиігі
news-img
overlay bottom
Дерек пен дәйек 2026-06-08
Хаткерлік білімдері
news-img
overlay bottom
Дерек пен дәйек 2026-06-08
САҚ пен САҢ (商)
news-img
overlay bottom
Дерек пен дәйек 2026-06-07
Jazu gigienası
Международное интернет-издание "Shalqar kz"
Подписка на важную информацию международного интернет-издания "Shalqar kz" Будьте в курсе последних новостей Ваша электронная почта подписаться