logo
burger menu search Қазақша language menu
Жолсапар

Автор: ADMIN

Жолсапар 2026-06-09 18:38:00

Біз әлеуметтік желілерде:

Қиыр мекен, кенді түбекте өткен дәстүрлі мәдениет көші

news single

   Қарашаның 24–30 жұлдызында Ақтау қаласында қазақ өнерінің жарық жұлдызы, ғаламат дарын иесі, актер Нұрмұхан Жантөриннің 80 жылдығына арналған Қазақстан театрларының XVI Республикалық театр фестивалі болып өтті. Ерекше сән-салтанатпен ұйымдастырылған өнер мерекесі Қазақстан Республикасының Мәдениет және ақпарат министрлігі мен Маңғыстау облыстық әкімдігінің тікелей қолдауымен өткізіліп, оған Қазақстан театрларының 12 ұжымы қатысты. Киелі мекен, кең түбек — Маңғыстау топырағына кіндік қаны тамып, өнер қуып қиянға кеткен биік тұлғаның 80 жылдығына арнайы ұйымдастырылған мерейтой бір аптаға ұласты. Мәдениет ошақтарының өрісі кеңейіп, гүлденуі сол елді басқарып отырған ел ағаларының қолдауына тікелей байланысты екендігі белгілі.

 

   Фестивальдің алғашқы күні саңлақ таланттың есімін алған Нұрмұхан Жантөрин атындағы Маңғыстау облыстық музыкалық драма театрының еңселі ғимараты алдында облыс әкімі Қырымбек Көшербаевтың өзі актердің кеудемүсінін ресми ашып, салтанатты түрде мерекені бастап берді. Театр ұжымдарының шығармашылық ізденістерін ынталандырып, осы заманғы сахналық үдерістердің басым бағыттарын анықтау, театр репертуарларын жоғары деңгейдегі қойылымдармен толықтыру мақсатын көздеген фестивальдің өткізілу барысында Мәдениет министрлігі тарапынан облыстық театр қойылымдарына арнайы іріктеу жүргізіліп, байқауға қатыстырылатын театрлар құрамы күні бұрын анықталыпты. Арнайы іріктеуден өткен театрлар осы фестиваль аясында соңғы жылдары қойылған түрлі жанрдан құралған үздік классикалық қойылымдарын көрермен назарына ұсынды. Өнер бәсекесінде бақ сынай келген театр ұжымдарының ішінде алғашқы болып Өскемен қаласының Жамбыл атындағы Шығыс Қазақстан облыстық драма театры Жүсіпбек Аймауытовтың «Ақбілек» драмасы бойынша өнер көрсетті. Актер, режиссер үшін еңбектің лайықты бағаланғанынан артығы жоқ.

 

    КСРО Халық әртісі Асанәлі Әшімов, театр қайраткері, ҚР Мәдениет және ақпарат министрлігі Мәдениет комитеті Өнер басқармасының бастығы Бақыт Бөкебаев, театр сыншысы, өнертану ғылымдарының кандидаты Жанна Жантөрина, театр сыншысы, өнертану ғылымдарының кандидаты, профессор Сәния Қабдиева, журналист, «Казахстанская правда» республикалық газетінің Мәдениет бөлімінің шолушысы Бекен Қадыров, Қазақстан Суретшілер одағының мүшесі, Қазақстанның еңбек сіңірген өнер қайраткері Есенгелді Тұяқов және Қазақстанның Халық әртісі, режиссер, профессор Есмұхан Обаев сынды өнер қайраткерлерінен түзілген қазылар алқасы әрбір қойылымға талдау жасап, тұжырымдап отырды. Күніне екі мезгіл спектакль көрсетіп, ақтаулық көрерменнің ықыласына бөленген театр ұжымдарының дені жастардан құралады екен. Мәселен, Сәбит Мұқанов атындағы Солтүстік Қазақстан драма театры, Түркістан және Өскемен театрларындағы аға ұрпақтың өнеге үлгісімен өнерге келіп жатқан жас толқын өздерінің соны ізденістерімен көңілге әлдебір жылылық ұялатты. Өндірдей жас актерлер труппасының сахналық шеберлігі келісіп, режиссура да ұтымды шешімін тапқан қойылымдардың ішінде Солтүстік Қазақстан облысы Петропавл қаласының С. Мұқанов атындағы мемлекеттік қазақ сазды-драма театрын ерекше атауға болар еді. А. Володин шығармасы бойынша сахналанған, көркемдік-идеялық мазмұны терең, күрделі аударма «Қос жебе» драмасы режиссерлік тың көзқараспен, актерлік шеберлікпен өнерсүйер қауымды елең еткізді.

 

   Қойылымды жас театр ұжымы

 

  С. Сейфуллин атындағы Қарағанды облыстық драма театрының бас режиссері К. Қасымовты арнайы шақыртып, тұңғыш рет 2007 жылы сахналаған екен. Алғашқы қауымдағы адамдар бейнесіне еніп, өмірдің ақ пен қарасын ажыратып, тек қана әділдікке қызмет ету жолын меңзеген кейіпкерлердің қилы мінездердегі сахналық кескіндері сәтті қойылған. Бүгінде республиканың үздік театрлары қатарынан көріне білген Ж. Аймауытов атындағы Павлодар облыстық қазақ музыкалық драма театры қойған Э. Де Филиппо шығармасының аудармасы — «Филумено Мартурано» комедиясында орта буын тәжірибелі актерлермен қатар сахнаға енді ғана қадам басқан жастар тобы өнер көрсетті. Ал Қызылорда облыстық Н. Бекежанов атындағы қазақ музыкалық драма театры сахналаған Тауфик әл-Хакимнің «Сұлтанның сасқаны-ай» комедиялық спектаклі аға буын, орта және кіші буыннан, яғни 60 жастан бастап 9-10 жасар балаға дейінгі актерлерді құрайтын труппаның бай құрамымен ерекшеленді. Сондай-ақ біртуар актердің есімін алған Н. Жантөрин атындағы Маңғыстау облыстық музыкалық драма театрының жас толқын өнерпаздары орындаған Ф. Эрве шығармасының аудармасы — «Мадемуазель Нитуш» комедиясы көрерменнің биік талғамына жауап бере алатындай туындылар қатарында болды десек қателеспейміз. Қойылымның сапалы болуы режиссерлік тапқырлықтың жан-жақтылығы мен терең ізденісіне көп байланысты дейтін болсақ, Павлодар театрының режиссері Ерсайын Тәпенов, Қызылорда театрының режиссері Әмір-Темір Хұсейін Жүсіпұлы, режиссер Гүлсина Мерғалиева мен Нұрнияз Мұқанұлы басшылық ететін Н. Жантөрин атындағы маңғыстаулық театр сынды аталмыш үш ұжымда да режиссер мен актерлер ойыны тоғысып, бір-бірінің еңбегін толықтырып, сахналық шығарманың сәтті шыққандығына куә болдық.

 

    Спектакльдегі ансамбльдік бірлестік сақталып, шағын мизансценалар жасауда әртүрлі қимыл-әрекеттердің құйып қойғандай үйлесуінің өзі театр ұжымы мен режиссерлік ұтқыр шешімнің тәжірибедегі жоғары деңгейінен хабар беріп тұрды. Аталған театрлар сахналаған қойылымдардың жанры ұқсас болғанымен, көркемдік көрік, тың мазмұн тауып, әрқайсысы өз дәрменінше бүгінгі күннің өзекті мәселесін көрсетуде сауатты да мәдениетті түрде әрқилы ізденгені көңіл қуантты. Режиссер, марқұм Райымбек Сейтметов қасиетті Түркістан топырағында қабырғасын қалап, іргесін көтерген Түркістан қалалық сазды-драма театрының бүгінгі тізгінін өз қолына алған көркемдік жетекшісі Ерғали Оразымбетұлы Шот-Аман Уәлихановтың «Кадет Шоқан» тарихи драмасын алып, үш күн, үш түндік шалғай мекеннен ат терлетіп, осы өнер додасы үшін арнайы жетіпті. Қойылымның сахналануынан кейін жас актерлердің шеберлігіне ризалық білдіріп, талдау жасаған қазылар алқасының мүшесі Есмұхан Обаев сахнада ойнау шеберлігінде актерлерге тұсау боларлықтай үйреншікті қағиданың тоңын жібітіп, ұжымның дәуір тынысына сай жаңа талаптармен еңбек етуін тілге тиек етті.

 

   Маман сыншылардың талқысына түскен аз-кем кемшіліктеріне қарамастан, «Кадет Шоқан» қойылымында шығармашылық жас ұжымның аз жылдар ішінде күрделі сахна шеберлігін меңгергендігі байқалып тұрды. Фестивальге қатысқан қойылымдардың жақсы қасиеттерімен бірге, айтарлықтай кемшіліктері де кездесіп жатты. Мәселен, Махамбет Өтемісұлы атындағы Атырау облыстық қазақ драма театры сахналаған М. Әуезовтің «Қарагөз» трагедиясы көрерменді оншалықты баурап ала қойған жоқ. І. Омаров атындағы Қостанай облыстық қазақ драма театры қойған «Еңлік-Кебек» трагедиясынан да біраз кемшіліктер байқалды. Сахнадағы оқиға пердесі Мұхтар Әуезовтей біртуар тұлғаның көркем ойымен өрнектеліп, пәрменді басталғанымен, қойылымның маңызын ашатын декорация, кейіпкерлердің киім үлгісі қонымсыз болды. Оған қоса қойылымдағы ең күрделі міндет басты кейіпкерлердің үлесінде екендігін ескерсек, спектакльдегі басты деген соқталы рөлдерде сынға түскен жас актерлердің сахна өнерінде әлі де болса балаңдығы байқалып қалды. Ұлттық драматургиямызда тыңнан түрен салған Мұхтар Әуезовтей дарын иесінің еңбегін өз биігінде жеткізе алмаған облыстық қос театрдың атына айтылған сын да ауыр болды. Қойылымға сараптама жасай келе қазылар алқасының мүшесі Бақыт Бөкебаев: «Режиссер, актер, суреткер болып ынтымақтаса қызмет етуді талап ететін бұл қойылым әлі де болса шоқтығы биік шеберлікті қажет етеді. Егер М. Әуезовті білмейтін кісі мына қойылымды көрсе, біздің тегеурінді жазушымызды ең нашар жазушы екен деп ойлаған болар еді. Сондықтан бұл қойылымды елге көрсету ұят, біз бұл спектакльді «жоқ» деп бағалаймыз», — деп «Еңлік-Кебек» трагедиясына салмақты сын айтты.

 

   Елордамыз Астанадан В. Дельмар шығармашылығынан аударылған «Баянсыз бақ» психологиялық драмасымен келген Қ. Қуанышбаев атындағы қазақ музыкалық драма театры ұжымының сахналаған қойылымына да, Тахауи Ахтанов атындағы Ақтөбе облыстық драма театрының орыс труппасы сахналаған Н. Гогольдің атақты «Үйлену» комедиясына да сарапшылар тарапынан ұқсас пікір айтылды. Екі спектакльде де актерлер тобы лайықты өнер көрсеткенімен, сахнаның сценографиялық тұрғыдан декорациясының тым күңгірт тартқан сүреңсіздігі айтылды. Сонымен қоса режиссердің кәсіби дайындығының таяздығы да сөз болды. Дәл осы тұста сарапшылар сахнадан көрерменге кері әсер тудыратын мизансценалық көріністерді, мәселен, темекі шегу, анайы сөйлеу, әртүрлі ұсқынсыз жесттерді сахнада жасап көрсетудің қажеттілігі шамалы екендігін баса ескертті. Эксперименттік қойылым ретінде У. Шекспирдің «Гамлет» трагедиясын көпшілік назарына ұсынған Астана қаласы Қазақ ұлттық музыка академиясының «Актерлік шеберлік пен режиссура» кафедрасы студенттерінің модерн үлгісіндегі қойылымының кескіні өзгеше болды. Орыс тілінде басталған қойылымда небәрі үш актер бастан-аяқ ойнайды. Қазақ, орыс, ағылшын — үш тілді қамтыған спектакль аз актермен саз ойналып шыққан туынды болды. Бүгінгі «Гамлетті» қыз бейнесінде сомдаған актрисаның ойнау шеберлігі талғамы биік көрерменнің көңілінен шыққан сыңайлы. Театр фестивалінің соңғы күндері Орал қаласының Батыс Қазақстан облыстық қазақ драма театры сахналаған А. Камюдің «Калигула» трагедиясы да көрермен қауымның эстетикалық-көркемдік талғамын қанағаттандырған қойылымдардың бірі болды.

 

   Шырғалаңға толы, бір-бірімен сабақтасып жатқан үрдіс бойынша сан қилы заман ағымында 27 жасында ел билеп, озбыр зұлымдығымен бұқара жұрттың жадында мәңгі қалған «Калигуланы» тарихи дәлдікті дөп басып, шебер сомдаған тастүлек өнерпаз Қуаныш Амандықовтың өнеріне қалың көрермен қатты сүйсінді. Қойылым режиссер, суретші тарапынан да сәтті бағасын алған спектакльдердің бірі болды. Әр қойылымның соңынан өнер көрсеткен ұжымдарға арнайы сыйлықтар мен Нұрмұхан Жантөриннің кеудемүсінінің сувенирлік нұсқасы ескерткішке табысталды. Халықтық мерекеге айналып, үлкен дүбірмен өткен бұл театр фестиваліне ақтаулық көрермен ерекше ықылас білдірді. Күн сайынғы қойылымдарға көрерменнің көптеп келгені соншалық, тіпті залға сыймай, бір топ көрермен сыртта да қалып жатты. Мұнымен Маңғыстау тек кен қазынаның мекені ғана емес, рухани мәдениеті өскен көрермені бар өңір екенін де көрсетті. Бір аптаға созылған XVI Республикалық театр фестивалі де өз мәре сызығына келіп жетті. Жабылу салтанатында 7 адамнан түзілген қазылар алқасы атынан сөз алған Қазақстанның Халық әртісі, режиссер Есмұхан Обаев біртуар тұлға Нұрмұхан Жантөриннің 80 жылдығына арналған фестивальдің табысты өткендігін, өнер додасының күткен үдеден шығып, режиссердің шешімінің ұқыпты таңдалғандығын, бәрі-бәрін, бір сөзбен айтқанда, фестивальдің сәтті өткендігін сөз ете отырып, қатысқан барлық 12 театр ұжымына да салтанатты түрде арнайы дипломдар табыс етті.

 

    Нұрмұхан Жантөриннің шаңырағы атынан тағайындалған арнайы сыйлықты актердің жары Жантөрина Маргарита Викторовна Астана қаласындағы Ұлттық қазақ музыка академиясының «Актерлік шеберлік және режиссура» кафедрасының 5-курс студенті, жас режиссер Юрий Толочкоға табыс етті. Тек бұл ғана емес, жас режиссер қазылар алқасының шешімімен 200 мың теңге сыйақымен «Үміт» сыйлығымен де қоса марапатталды. Сондай-ақ «Ең үздік екінші пландағы ер адам бейнесі» сыйлығымен марапатталып, 250 мың теңге сыйақы Махамбет Өтемісұлы атындағы Атырау облыстық драма театрының актері Совет Қожабековке берілді. «Екінші пландағы ең үздік әйел бейнесі үшін» сыйлығымен және 250 мың теңге сыйақымен Н. Жантөрин атындағы Маңғыстау облыстық музыкалық драма театрының актрисасы Майра Бақытнұрова марапатталды. «Дебют» сыйлығы үшін марапатталып, 200 мың теңге сыйақы көлеміндегі премия Батыс Қазақстан облыстық қазақ драма театрының режиссері Мұханғали Томановқа тағайындалса, талантты режиссер қойған спектакльдің басты кейіпкері — «Калигуланы» сомдаған Қуаныш Амандықов 300 мың теңге сыйақымен «Ең үздік ер адам бейнесі» сыйлығымен марапатталды. Қуаныштың сыйлығын табыс ете отырып сөз алған КСРО Халық әртісі Асанәлі Әшімов: — Осы фестивальдегі көрерменнің жанын жадыратып, жанарын жарқ еткізген бейне осы «Калигуланың» бейнесі болды. Бұл жігіт менің жастық шағымды есіме түсірді. Бақ құсындай басына ерте қонған дәрежеге, мақтау-мадаққа дандайсымайды ғой деп ойлаймын. Келешегі зор. Болашақта бұл актер туралы әлі талай еститін боласыздар, сондықтан құттықтаймын, балам! — деп сөзін түйіндеді. Ал «Ең үздік әйел бейнесі» сыйлығымен марапатталып, 300 мың теңге сыйақымен Қалибек Қуанышбаев атындағы қазақ музыкалық драма театрының актрисасы Гүлжан Әспетова марапатталды. В. Дельмар шығармасының аудармасы бойынша режиссер Әзірбайжан Мәмбетов қойған «Баянсыз бақ» спектаклінде Гүлжан Әспетова Миссис Купер бейнесін шебер сомдаған болатын. Қомақты сыйақыдан шебер режиссерлар да құралақан қалмады. «Ең үздік режиссерлық шешімі үшін» сыйлығымен 350 мың теңге сыйақы Түркістан сазды-музыкалық драма театрының режиссері Ерғали Оразымбетовке тағайындалды.

 

   Ал театр ұжымдарын марапаттау рәсіміне келетін болсақ, 250 мың теңге сыйақы мен арнайы дипломмен Өскемен қаласының Жамбыл атындағы Шығыс Қазақстан облыстық драма театры «Ақбілек» драмасы үшін және І. Омаров атындағы Қостанай облыстық драма театры «Еңлік-Кебек» трагедиясы қойылымымен марапатталды. Фестивальдің «Шығармашылық табысы үшін» арнайы дипломымен қоса 250 мың теңге сыйақымен Т. Ахтанов атындағы Ақтөбе облыстық драма театры «Үйлену» комедиясын қойғаны үшін марапатталды. Дүбірлі фестивальдің үшінші орын жүлдесімен марапатталып, 500 мың теңге сыйақы Нартай Бекежанов атындағы Қызылорда облыстық музыкалық сазды-драма театры ұжымына «Сұлтанның сасқаны-ай» комедиялық қойылымы үшін берілді. Екінші орын жүлдесі және 600 мың теңге сыйақымен Сәбит Мұқанов атындағы Солтүстік Қазақстан облыстық музыкалық сазды-драма театры «Қос жебе» драмалық қойылымы үшін марапатталды. Фестивальдің бірінші орын номинациясы облыстық театрлардың ішінде жұлдызы жанған екі театр ұжымына берілді. Жүсіпбек Аймауытов атындағы Павлодар облыстық драма театры «Филумено Мартурано» комедиялық қойылымымен және Нұрмұхан Жантөрин атындағы Маңғыстау облыстық сазды-драма театры «Мадемуазель Нитуш» (көп көрерменге «Түлкі бикеш» атауымен танымал) комедиялық қойылымы үшін жүлделі бірінші орынды иемденді. Сонымен, ұлы актердің жолын қуған, бүгінде есімін алып, туын желбіреткен талантты ұрпақтары ұлы шебердің даңқын елге бұрынғыдан да гөрі мәшһүр ете түсетіндігін тағы бір дәлелдеді. Әр облыстан келген театр ұжымдарын қарсы алудан бастап, оларды қонақүйлерге жайғастыру, ас-суларын уақтылы дайындап беру, қаланың көрікті жерлерімен таныстыру, аралату деген сияқты жұмыстардың барлығында да жергілікті Маңғыстау облыстық Нұрмұхан Жантөрин атындағы театрдың тұтастай ұжымы тік тұрып қызмет етті. Осы істерге басшылық жасаған театр директоры Нұрнияз Мұқанұлы Мұқанов мырзаға көпшіліктің айтқан алғысы шексіз. Облыс әкімі Қырымбек Елеуұлы Көшербаев мырза болашақта облыс тарапынан жергілікті мәдени ошақтарға бұдан да жақсырақ көңіл бөлінетіндігін және Каспий жағалауында театрға арналған ақшаңқан зәулім сарайдың жобасы сызылып, театр құрылысының жақын жылдарда ерекше қарқынмен басталатындығын қуанышпен жеткізді. Төл театрларымыз бен драматургтеріміздің, режиссерлар мен актерларымыздың бағытын анықтап, шабысын байыптауда мұндай ауқымды мәдени шараны жиі өткізудің орны орасан. Мәселен, режиссура өнерінің тапшылығынан жүдеген кейбір жас театр ұжымдары өз орталарынан режиссер кадрын дайындауды қолға алыпты. Қазір кейбір облыстардың театр сахнасында актерлар арасынан шыққан режиссерлардың туындылары көпшілік көрерменге ұсынылып келеді. Сондай-ақ бүгінгі рухани жан азығы, тіл ұстартудың биік үлгісі саналатын сахна тілінің салмақсыз, сылдыр сөзге айналып бара жатқандығы, актердің сахнада сөз саптау өнерінен гөрі эмоциялық айғайға, көбінесе тек қимыл-әрекетке баса ден қоятындығы да баса айтылды. Мұны сыншылар университет қабырғасында білім алып жүрген студенттерге арналған «Сөйлеу өнері» пәнінен дәріс беретін арнайы маман-ұстаздардың жетіспеушілігі мен тәжірибесіздігі салдарынан болған кемістік екендігін де айтып өтті. Осы секілді театр ұжымдарындағы түйінді мәселелер жыл сайын дәстүрлі түрде өткізіліп отыратын театр фестивальдерінде шешілуі керек деген ұйғарымға келді. Театр фестивалінде куә болған тағы бір жайт туралы айтайық. Республикалық театр фестивалінің барысында шалғай жерлерден жеткен өнер ордаларының бір-бірінің ойынын тамашалауға мүмкіндігі болмады. Бүгін қойылым қойып өнер көрсеткен ұжым спектакльдерін сахналап болысымен-ақ жүктерін қайта жиып, елдеріне қайтып кетіп жатты. Яғни театрлар арасындағы шығармашылық байланыс түзілген жоқ. Фестивальдің соңын тосу үшін олардың жататын орындарына, тамақтануына жеткілікті қаражат алдын ала бөлінуі керек еді. Бұл жағы ойластырылмаған. ҚР Мәдениет және ақпарат министрлігі Мәдениет комитеті Өнер басқармасының бастығы Бақыт Бөкебаев министрлікке дәл осы мәселені шешуді жеткізетіндігін айтты. Театрдың шығармашылық деңгейіне, актерлар ойыны мен жалпы режиссерлық шешімдерге берілген бағалар, толық сын-ескертпелер — арнайы театр мамандарының ендігі айтар әңгімесі. Ал біз өз тарапымыздан көзбен көрген әсерімізді там-тұмдап болса да тілге тиек етуді ниет еттік және бұдан былайғы уақытта ұлттық төл театрларымыз арасында гастрольдік сапарлар жобасы өзінің тиісті ырғағына түсіп, театр өнеріне лайықты көңіл бөлінер деген үмітті үкіледік. Жыл сайынғы халықтық дәстүрге айналып, үзіліссіз өткізіліп келе жатқан «Еуразия» кинофестиваліне мұхиттың арғы-бергі жағынан шақырылатын, дәстүрі де, тілі де өзге актер, өнер майталмандарының тек біреуіне ғана жомарттықпен ұсынатын сый-тартуымыздың шығыны ұлттық театр ұжымдарының бір труппалық ұжымына кететін жол шығынынан асып түсетінін ескерсек, өзгенің қаңсығын өзімізге таңсық еткенше, ұлттық қазынамыздың қомақты бөлігі төл өнеріміздің игілігіне жаратылып жатқанына не жетсін?!

 

   Жазира АМАНТАЙҚЫЗЫ

 

   Алматы – Ақтау – Алматы

 

   2008 жыл

Басқалармен бөлісе отырыңыз
Пікірлер

Басты жаңалықтар

img
Новости 2026-07-27

В Казахстане назвали основные препятствия для развития телемедицины
img
Жаңалықтар 2026-07-28

Алматыда курьер зейнеткерді телефон алаяқтарынан құтқарып қалды
img
Новости 2026-07-28

В Алматы курьер не позволил мошенникам завладеть деньгами пенсионера
news-img
overlay bottom
Новости 2026-07-28
В Алматы курьер не позволил мошенникам завладеть деньгами пенсионера

Последние новости

img
Жаңалықтар 2026-07-28

Almatıda kur'er zeynetkerdi telefon alayaqtarınan qwtqarıp qaldı
img
Жаңалықтар 2026-07-28

الماتىدا كۋرьەر زەينەتكەردى تەلەفون الاياقتارىنان قۇتقارىپ قالدى
img
Новости 2026-07-28

V Almatı kur'er ne pozvolil moşennikam zavladet' den'gami pensionera

Все новости

news-img
overlay bottom
Жаңалықтар 2026-07-28
Almatıda kur'er zeynetkerdi telefon alayaqtarınan qwtqarıp qaldı
news-img
overlay bottom
Жаңалықтар 2026-07-28
الماتىدا كۋرьەر زەينەتكەردى تەلەفون الاياقتارىنان قۇتقارىپ قالدى
news-img
overlay bottom
Новости 2026-07-28
V Almatı kur'er ne pozvolil moşennikam zavladet' den'gami pensionera
news-img
overlay bottom
Новости 2026-07-28
ۆ الماتى كۋرьەر نە پوزۆوليل موشەننيكام زاۆلادەتь دەنьگامي پەنسيونەرا
news-img
overlay bottom
Новости 2026-07-28
В Алматы курьер не позволил мошенникам завладеть деньгами пенсионера
news-img
overlay bottom
Жаңалықтар 2026-07-28
Алматыда курьер зейнеткерді телефон алаяқтарынан құтқарып қалды
news-img
overlay bottom
Новости 2026-07-27
В Казахстане назвали основные препятствия для развития телемедицины
news-img
overlay bottom
Жаңалықтар 2026-07-27
Қазақстанда телемедицинаны дамытуға қандай кедергілер бар?
news-img
overlay bottom
Қоғам 2026-07-26
«Tolıq adam» jobası ayasında Naurızbay audanınıñ twrğındarımen mazmwndı kezdesuler ötti
Международное интернет-издание "Shalqar kz"
Подписка на важную информацию международного интернет-издания "Shalqar kz" Будьте в курсе последних новостей Ваша электронная почта подписаться