Алmaty Tourism Bureau мен Mastercard бірлесіп жүргізген зерттеу Алматыға келетін туристердің қозғалысын, таңдауларын және негізгі трендтерін анықтады. Қалаға келетін саяхатшылардың саны жыл сайын артып, Алматы Орталық Азиядағы басты туристік хаб ретінде өз орнын нығайта түсуде, деп хабарлайды Shalqar.kz.

Mastercard-тың Tourism Insights деректеріне сүйенсек, Алматы туристік іздеу сұраныстарының 29,7%-ын иеленіп, аймақтағы ең танымал бағыттардың бірі болып отыр. Бұл өткен жылмен салыстырғанда 2%-ға жоғары. Өсімнің негізгі себептерінің бірі – әуе қатынасының кеңеюі:
 • Дәстүрлі әуе компанияларының рейстері 24,7%-ға артты.
 • Лоукостерлердің рейстер саны 44,5%-ға көбейді.

Сондай-ақ, қайталай келетін туристер саны 78,6%-ға өсті. Туристер енді билеттерін ертерек, орта есеппен 40 күн бұрын іздейді.

Алматыны таңдаған туристердің ішінде Қытайдан келгендер саны күрт артқан. 2024 жылдың алғашқы жартысында Қытайдан жасалған брондаулар саны 6 есеге өсіп, 25,2 мың билетке жетті. Сонымен қатар, ең көп брондау жасаған елдердің көшін Түркия бастап тұр. Бұл екі ел арасындағы іскерлік байланыстың жоғары екендігін көрсетеді.

Зерттеу көрсеткендей, Алматыға келетін саяхатшылардың басым бөлігі белсенді демалысты қалайды:
 • 54%-ы табиғат аясындағы турлар мен экскурсияларды таңдайды.
 • 44%-ы джип-турларға қызығушылық танытады.

Сонымен қатар, Алматы гастрономиялық туризм, шопинг және ойын-сауық бойынша да танымал бағытқа айналып келеді. Туристердің 70%-ы осы салаға оң бағасын берген. Отбасылық туризмнің танымалдығы да артып, оған оң пікірлер саны 12%-ға көбейген.

Туризм тек демалыс үшін ғана емес, іскерлік мақсатта да маңызды рөл атқаруда. Алматыда өтетін халықаралық форумдар мен іскерлік кездесулер саны артып, бизнес-сапарларға жұмсалатын шығындар үш есеге көбейді.

Алmaty Tourism Bureau Алматының Орталық Азиядағы басты туристік хабқа айналу процесі қарқынды жүріп жатқанын атап өтті. Қаланың әуежайы арқылы транзитпен өтетін жолаушылар саны артып, Алматының халықаралық байланыстардағы рөлі күшейе түскен. Бұл зерттеу Алматының әрі қарай да танымал бағыт болып қала беретінін дәлелдейді.