Қазақстан қазақ тілінде жұмыс істейтін жасанды интеллект моделін әзірлеуде. KazLLM деп аталатын жаңа жүйе мәтінді түсіну, өңдеу және генерациялау мүмкіндігіне ие, деп хабарлайды Shalqar.kz.

Цифрлық даму, инновациялар және аэроғарыш өнеркәсібі министрлігінің мәліметінше, KazLLM аударма жасау, құжаттарды сұрыптау және диалогты автоматтандыру сияқты түрлі тапсырмаларды орындай алады. Жобаны Ақылды жүйелер мен жасанды интеллект институты (ISSAI) әзірлеуде.

Қазір модель ұлттық жасанды интеллект платформасында сынақтан өтіп жатыр. Мамандар оның қазақ тілін өңдеу қабілетін басқа ашық дереккөздерге негізделген жүйелермен салыстырып бағалауда.

ChatGPT мен KazLLM айырмашылығы қандай?

KazLLM қазақ тілі мен ұлттық ерекшеліктерге бағытталған. Жүйе қазақ тілінің грамматикасын, мәдениетін және тарихи деректерін ескере отырып жұмыс істейді. Бұл оны әлемдік аналогтардан ерекшелендіреді.

Жоспар бойынша, тестілеу аяқталған соң, KazLLM мемлекеттік және жеке сервистерге енгізіледі.