Қазақстанның барлық өңірінде 70-ке жуық жаңа денсаулық сақтау нысанын салу жоспарланып отыр. Бұл туралы Денсаулық сақтау министрі Ақмарал Әлназарова Үкімет отырысында мәлімдеді.

Жоспарға 1 700 төсек-орынға арналған сегіз перинаталдық орталық, 1 550 төсек-орындық жеті көпбейінді балалар ауруханасы және Астанада балаларға арналған шұғыл көмек пен хирургия орталықтары кіреді.

Сонымен қатар Алматы, Ақтау, Атырау, Қызылорда және Семей қалаларында балаларды оңалту орталықтарының бес өңіраралық филиалын ашу көзделген.

Министрдің мәліметінше, жаңа жобалар медициналық көмектің қолжетімділігін арттыруға және елдің денсаулық сақтау инфрақұрылымын жаңғыртуға бағытталған.