Қазақстанда педагогтерге міндетті құжаттар санын 25-тен 5-ке дейін қысқарту жоспарланып отыр. Бұл туралы Оқу-ағарту министрі Жұлдыз Сүлейменова Үкімет отырысында мәлімдеді.

Министрдің айтуынша, ұсынылған тізімге сабақ жоспары, электрондық журналдағы үлгерім мәліметтері, қосымша білім беру педагогтерінің сабақтан тыс жұмысын есепке алу журналы, сынып жетекшілерінің «Адал азамат» бағдарламасын іске асыру жоспары және сұраныс бойынша берілетін оқушы мінездемесі кіреді.

Өзгерістерді іске асыру үшін тиісті нормативтік-құқықтық актілерге түзетулер енгізу көзделіп отыр.

Сонымен қатар, мектептерде қолданылатын 70-тен астам цифрлық жүйені біріктіріп, мұғалімдердің әкімшілік жүктемесін азайту жоспарланған.