Қазақстан ғылымында жаңа кезең басталды. Кеше Алматыда «ҚР Ұлттық ғылым академиясы» республикалық қоғамдық бірлестігі ресми түрде таратылды. Бұл шешім ұйымның жалпы жиналысында қабылданып, көпшілік дауыспен бекітілді, деп хабарлайды Shalqar.kz.

Жиынға қатысқан академиктердің пікірінше, елдегі ғылыми әлеуетті тиімді шоғырландыру үшін екі академияның қатар өмір сүруі орынсыз. Ғылымды дамыту және ел мүддесін қорғау мақсатында барлық ресурстарды бір орталыққа бағыттау қажеттігі айтылды.

2003 жылы ҚР Президентінің жарлығымен Ұлттық ғылым академиясы қоғамдық ұйымға айналған еді. Бұл өзгеріс ел ғылымында дағдарысты күшейтіп, көптеген талантты ғалымдардың шетелге кетуіне себеп болды. Осы уақыт аралығында академияны академик Мұрат Жұрынов басқарды. Ол ұйымды Қаныш Сәтбаев негізін қалаған ҰҒА-ның заңды мұрагері деп санады.

2023 жылы ҚР Президентінің жанынан жаңа Ұлттық ғылым академиясы құрылды. Бұдан былай бүкіл ғылыми қауымдастық осы жаңа ұйымның аясында бірігеді.

Айта кетерлігі, бұрынғы ҰҒА мүшелері (148 академик) жаңа академияға кіру үшін арнайы талаптардан өтуі тиіс. Бұрынғыдай тек лауазымды тұлға болғаны үшін академик атану мүмкін емес. Бұл өзгеріс еліміздегі ғылыми ортада әділдік орнатуға бағытталған маңызды қадамдардың бірі.