بريتان عالىمدارى ىشەك قاتەرلى ىسىگىن ەرتە كەزەڭدە انىقتايتىن يننوۆاتسييالىق روبوت جاساپ شىعاردى. تيىن كولەمىندەي ميدييا تارىزدى بۇل قۇرىلعى ادام اعزاسىندا ەركىن قوزعالىپ, توق ىشەكتىڭ ۇش ولشەمدى كەسكىنىن جاسايدى, دەپ حابارلايدى Shalqar.kz.

روبوت سىرتقى ماگنيتتىڭ كومەگىمەن اسقازان-ىشەك جولى ارقىلى جىلجيدى. دارىگەرلەر وسىنداي قۇرىلعىنىڭ كومەگىمەن قاتەرلى ىسىكتى باستاپقى ساتىسىندا انىقتاپ, ناۋقاستارعا اۋىرتپالىقسىز تەكسەرىس جۇرگىزە الادى.

جاڭا تەحنولوگييانى ليدس, گلازگو جانە ەدينبۋرگ ۋنيۆەرسيتەتتەرىنىڭ زەرتتەۋشىلەرى ازىرلەگەن. باستاپقى سىناقتار جانۋارلارعا جاسالىپ, وڭ ناتيجە كورسەتكەن. 2025 جىلى روبوت ادامدارعا سىنالماق. مامانداردىڭ ايتۋىنشا, بۇل قۇرىلعى داستۇرلى ادىستەرگە قاراعاندا دالدىلىگى جوعارى ارى شىعىنى تومەن بولادى.

عالىمدار بۇل روبوتتىڭ اسىرەسە ايەلدەرگە پايدالى ەكەنىن ايتادى. سەبەبى ايەلدەردىڭ ىشەگى ەرلەرگە قاراعاندا ۇزىنىراق, سوندىقتان ادەتتەگى تەكسەرىستەر ولار ۇشىن جايسىز وتەدى.

ميدييا-روبوت تەك دياگنوستيكا جاساپ قويماي, ۋلьترادىبىس كومەگىمەن دارى-دارمەكتى اعزاداعى قاجەتتى جەرگە جەتكىزە الادى.

دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرىنە سۇيەنسەك, ىشەك قاتەرلى ىسىگى الەمدە ەڭ كوپ تارالعان اۋرۋلاردىڭ بىرى. 2022 جىلى بۇل دەرتكە 1,9 ميلليون ادام شالدىققان, ال 900 مىڭ ادام قايتىس بولعان.

ەڭ الاڭداتارلىعى – سوڭعى جىلدارى 50 جاسقا دەيىنگى ادامدار اراسىندا ىشەك قاتەرلى ىسىگى جيىلەپ بارادى. ساراپشىلار مۇنى فاستفۋد پەن وڭدەلگەن تاعامداردى شامادان تىس تۇتىنۋمەن بايلانىستىرادى.