قازاقستان عىلىمىندا جاڭا كەزەڭ باستالدى. كەشە الماتىدا «قر ۇلتتىق عىلىم اكادەميياسى» رەسپۋبليكالىق قوعامدىق بىرلەستىگى رەسمي تۇردە تاراتىلدى. بۇل شەشىم ۇيىمنىڭ جالپى جينالىسىندا قابىلدانىپ, كوپشىلىك داۋىسپەن بەكىتىلدى, دەپ حابارلايدى Shalqar.kz.

جيىنعا قاتىسقان اكادەميكتەردىڭ پىكىرىنشە, ەلدەگى عىلىمي الەۋەتتى تيىمدى شوعىرلاندىرۋ ۇشىن ەكى اكادەمييانىڭ قاتار ومىر سۇرۋى ورىنسىز. عىلىمدى دامىتۋ جانە ەل مۇددەسىن قورعاۋ ماقساتىندا بارلىق رەسۋرستاردى بىر ورتالىققا باعىتتاۋ قاجەتتىگى ايتىلدى.

2003 جىلى قر پرەزيدەنتىنىڭ جارلىعىمەن ۇلتتىق عىلىم اكادەميياسى قوعامدىق ۇيىمعا اينالعان ەدى. بۇل وزگەرىس ەل عىلىمىندا داعدارىستى كۇشەيتىپ, كوپتەگەن تالانتتى عالىمداردىڭ شەتەلگە كەتۋىنە سەبەپ بولدى. وسى ۋاقىت ارالىعىندا اكادەمييانى اكادەميك مۇرات جۇرىنوۆ باسقاردى. ول ۇيىمدى قانىش ساتباەۆ نەگىزىن قالاعان ۇعا-نىڭ زاڭدى مۇراگەرى دەپ سانادى.

2023 جىلى قر پرەزيدەنتىنىڭ جانىنان جاڭا ۇلتتىق عىلىم اكادەميياسى قۇرىلدى. بۇدان بىلاي بۇكىل عىلىمي قاۋىمداستىق وسى جاڭا ۇيىمنىڭ اياسىندا بىرىگەدى.

ايتا كەتەرلىگى, بۇرىنعى ۇعا مۇشەلەرى (148 اكادەميك) جاڭا اكادەميياعا كىرۋ ۇشىن ارنايى تالاپتاردان وتۋى تيىس. بۇرىنعىداي تەك لاۋازىمدى تۇلعا بولعانى ۇشىن اكادەميك اتانۋ مۇمكىن ەمەس. بۇل وزگەرىس ەلىمىزدەگى عىلىمي ورتادا ادىلدىك ورناتۋعا باعىتتالعان ماڭىزدى قادامداردىڭ بىرى.