Қазақ боксшысы Даниял Сапарбай халықаралық аренада ел намысын абыроймен қорғап, World Boxing ұйымы ұйымдастырған Әлем кубогының алғашқы кезеңінде қола жүлдеге ие болды, деп хабарлайды Shalqar.kz Қазақстан бокс федерациясына сілтеме жасап.

+90 келі салмақта жұдырықтасқан Сапарбай жартылай финалда өзбекстандық мықты Жахонгир Зокировпен кездесіп, 0:5 есебімен ұтылды. Дегенмен, турнир қорытындысы бойынша үшінші орынға ие болып, Қазақстан қоржынына қола медаль салды.

Бүгін, 4 сәуір күні, рингке тағы бес отандасымыз шығады. Олар: Нұрсұлтан Алтынбек, Диас Молжігітов, Дәулет Төлемісов, Жазира Орақбаева және Ұлжан Сәрсенбек.

Айта кетейік, турнирдің алғашқы кезеңі Бразилияның Фос-ду-Игуасу қаласында өтуде. Ал екінші кезең 30 маусым мен 7 шілде аралығында Қазақстанда ұйымдастырылады.

World Boxing турнирі – ерлер мен әйелдер арасындағы үздік боксшылар рейтингтік ұпай үшін күш сынасатын ауқымды серия. Жыл соңында, қараша айында финалдық кезең өтеді. Бұл – әлемнің үздік былғары қолғап шеберлері үшін басты бәсеке болмақ.