قازاقستاندا العاش رەت گەولوگ ماماندار مەملەكەت تاراپىنان ارنايى ماراپاتقا يە بولدى. گەولوگتار كۇنى قارساڭىندا پرەمьەر-مينيستر ولجاس بەكتەنوۆ پرەزيدەنت قاسىم-جومارت توقاەۆتىڭ اتىنان سالا ۇزدىكتەرىنە مەملەكەتتىك ناگرادالار تابىس ەتتى, دەپ حابارلايدى Shalqar.kz.

جاڭا قۇرمەتتى اتاق — «قازاقستاننىڭ ەڭبەك سىڭىرگەن گەولوگى» — گەولوگييا سالاسىن دامىتۋعا قوسقان ايرىقشا ۇلەس ۇشىن بەرىلدى. بۇل – ەل ەكونوميكاسى مەن تابيعي بايلىق قورىن تولىقتىرۋ جولىنداعى ەڭبەكتىڭ جوعارى باعالانۋى.

قازىرگى تاڭدا ەلىمىزدىڭ 2 ملن شارشى شاقىرىمنان استام جەرى گەولوگييالىق بارلاۋ جۇمىستارىمەن قامتىلعان. سوڭعى جىلدا 38 جاڭا كەن ورنى تابىلسا, 2025 جىلى قاراعاندىدا سيرەك كەزدەسەتىن مەتالدار قورى 800 مىڭ توننادان اساتىن كۇيرەكتىكول ۋچاسكەسى اشىلادى دەپ كۇتىلۋدە.

سالاعا ينۆەستيتسييا تارتۋ, كومىرسۋتەك قورلارىن زەرتتەۋ, كادر دايارلاۋ — ۇكىمەت باسا نازار اۋدارىپ وتىرعان نەگىزگى باعىتتار. سوڭعى 2 جىلدا گەولوگييا ماماندىعى بويىنشا تۇلەكتەر سانى ەكى ەسەگە ارتقان.

ماراپاتتالعاندار قاتارىندا: ەلىمىزدىڭ جەتەكشى گەولوگتارى, عىلىم دوكتورلارى مەن جاس ماماندار. ولاردىڭ قاتارىندا مارات بيتيمباەۆ, سەرىكبەك داۋكەي, حايرلى ابىلحاسىموۆ, باقىتگۇل مۇسيەۆا سىندى ەسىمدەر بار.