Qazaqstanda alğaş ret geolog mamandar memleket tarapınan arnayı marapatqa ie boldı. Geologtar küni qarsañında Prem'er-ministr Oljas Bektenov Prezident Qasım-Jomart Toqaevtıñ atınan sala üzdikterine memlekettik nagradalar tabıs etti, dep habarlaydı Shalqar.kz.

Jaña qwrmetti ataq — «Qazaqstannıñ eñbek siñirgen geologı» — geologiya salasın damıtuğa qosqan ayrıqşa üles üşin berildi. Bwl – el ekonomikası men tabiği baylıq qorın tolıqtıru jolındağı eñbektiñ joğarı bağalanuı.

Qazirgi tañda elimizdiñ 2 mln şarşı şaqırımnan astam jeri geologiyalıq barlau jwmıstarımen qamtılğan. Soñğı jılda 38 jaña ken ornı tabılsa, 2025 jılı Qarağandıda sirek kezdesetin metaldar qorı 800 mıñ tonnadan asatın Küyrektiköl uçaskesi aşıladı dep kütilude.

Salağa investiciya tartu, kömirsutek qorların zertteu, kadr dayarlau — Ükimet basa nazar audarıp otırğan negizgi bağıttar. Soñğı 2 jılda geologiya mamandığı boyınşa tülekter sanı eki esege artqan.

Marapattalğandar qatarında: elimizdiñ jetekşi geologtarı, ğılım doktorları men jas mamandar. Olardıñ qatarında Marat Bitimbaev, Serikbek Däukey, Hayrlı Äbilhasımov, Baqıtgül Müsieva sındı esimder bar.