“بارىس” حوككەي كلۋبىندا كادرلىق وزگەرىس ورىن الدى. كوماندانىڭ رەسمي سايتىنداعى اقپاراتقا سۇيەنسەك, كلۋبتىڭ باس ديرەكتورى نۇرلان ورازباەۆ وز قىزمەتىنەن كەتكەن, دەپ حابارلايدى Shalqar.kz.

ورازباەۆ بۇل لاۋازىمعا 2024 جىلدىڭ قازان ايىندا تاعايىندالعان ەدى. باسشىلىققا كەلگەننەن كەيىن ول قۇرامدى قايتا جاساقتاپ, امەريكالىق جانە كانادالىق لەگيونەرلەردەن باس تارتتى. نەگىزگى باسىمدىق قازاقستاندىق جاس حوككەيشىلەرگە بەرىلدى. سونىمەن قاتار, كوماندادا رەسەيلىك ويىنشىلار دا ونەر كورسەتتى.

نۇرلان ورازباەۆ – قازاقستاندىق حوككەيدىڭ ارداگەرى. ول 1968 جىلى دۇنيەگە كەلگەن. ويىنشىلىق كارьەراسىندا قاراعاندىنىڭ “اۆتوموبيليست”, تەمىرتاۋدىڭ “بولات” جانە ەلوردالىق “بارىس” كوماندالارىندا ونەر كورسەتكەن. بۇعان دەيىن دە ول “بارىس” كلۋبىنىڭ پرەزيدەنتى قىزمەتىن ەكى مارتە اتقارعان (2006–2012 جانە 2013–2015 جىلدارى ارالىعىندا).

ايتا كەتەيىك, بيىل “بارىس” قۇرلىقتىق حوككەي ليگاسىندا (قحل) ساتسىز ماۋسىم وتكىزدى. كوماندا شىعىس كونفەرەنتسيياسىندا 12-ورىنمەن شەكتەلىپ, 68 ويىندا بار بولعانى 35 ۇپاي جينادى.