قازاقستان الداعى التى ايدا ەلگە تاۋىق جۇمىرتقاسىن كىرگىزۋگە ۋاقىتشا تىيىم سالدى. بۇل شەشىمگە اۋىل شارۋاشىلىعى مينيسترلىگى باستاماشى بولدى. مينيستر قول قويعان جاڭا بۇيرىق 2025 جىلعى 9 ساۋىردەن باستاپ كۇشىنە ەنەدى, دەپ حابارلايدى Shalqar.kz.

تىيىم بارلىق كولىك تۇرلەرىمەن ۇشىنشى ەلدەردەن جانە ەۋرازييالىق ەكونوميكالىق وداق ەلدەرىنەن جەتكىزىلەتىن جۇمىرتقالارعا قاتىستى. الايدا, ترانزيتتىك تاسىمالدار مەن ەاەو ەلدەرى اراسىنداعى ونىم وتۋىنە بۇل شەكتەۋ اسەر ەتپەيدى.

مينيسترلىك بۇل شەشىمدى كوكتەم-جاز مەزگىلىندە وتاندىق وندىرۋشىلەردى قولداۋ قاجەتتىلىگىمەن تۇسىندىرەدى. سەبەبى وسى كەزەڭدە جۇمىرتقاعا سۇرانىس تومەندەپ, نارىقتا ىشكى وندىرىس پەن ۇي شارۋاشىلىعى ونىمدەرى باسىم بولادى. بۇل جاعداي باعانىڭ تومەندەۋىنە, ال كەيدە وزىندىك قۇنىنان دا ارزان ساتىلۋىنا الىپ كەلىپ, قۇس فابريكالارىنىڭ تابىسىنا كەرى اسەر ەتەدى.

سونىمەن قاتار, جىلى مەزگىلدە جۇمىرتقانىڭ ساقتالۋ مەرزىمى قىسقارادى, ال وندىرىس كولەمى وزگەرمەيدى. بۇل تاۋاردىڭ قويمادا جينالىپ قالۋىنا سەبەپ بولادى.

سول سەبەپتى, ىشكى نارىقتى قورعاۋ ارى وتاندىق تاۋار وندىرۋشىلەردىڭ مۇددەسىن ساقتاۋ ۇشىن مينيسترلىك جۇمىرتقا يمپورتىنا ۋاقىتشا تىيىم ەنگىزۋدى قۇپ كوردى.