АҚШ-тың президенті Дональд Трамп шетелдік тауарларға салынатын 10%-дық тарифті 90 күнге кейінге қалдыру туралы шешім қабылдаған соң, әлемдік қор нарықтары серпіліс көрсетті. Бұл қадам инвесторларға сенім ұялатты: Уолл-стрит индекстері күрт өсті, деп хабарлайды Shalqar.kz.

Нақтырақ айтсақ, Dow индексі бірден 2300 тармаққа, ал технологиялық Nasdaq көрсеткіші 8,7%-ға көтерілді. Жалпы, АҚШ қор нарығы «жасыл аймаққа» оралып, 3,5 триллион долларлық өсім көрсетті.

3 сәуір күні Трамп 180-нен астам елге жаңа салық енгізетінін мәлімдеген еді. Тізімде Қытай да бар – 34%-дық тарифпен. Алайда келесі күні Қытай да жауапсыз қалмады: олар АҚШ өнімдеріне дәл сондай мөлшерде тариф енгізетінін жариялады. Бұл шара 10 сәуірден бастап күшіне енеді.

АҚШ-тың алғашқы мәлімдемесінен кейін Азиядағы қор нарықтары құлдырай бастаған еді. Алайда тарифтердің кейінге шегерілуі нарыққа оң әсерін тигізіп отыр.