Әлемдік нарықтағы тұрақсыздық пен тарифтік қақтығыстар Қазақстан экономикасына әсер ете бастады. Осыған байланысты Мемлекет басшысы Қасым-Жомарт Тоқаев Үкімет мүшелерімен шұғыл жиын өткізіп, қалыптасқан ахуалды саралады, деп хабарлайды Shalqar.kz Ақордаға сілтеме жасап.

Жиынға Премьер-министр Олжас Бектенов, Ұлттық банк төрағасы Тимур Сүлейменов және басқа да жауапты тұлғалар қатысты. Кездесу барысында энергия ресурстары мен негізгі тауарлар бағасының құлдырауы, сыртқы нарықтағы белгісіздік және оның ел ішіндегі салдары талқыланды.

Президент Үкімет пен әкімдіктерге қысқа мерзім ішінде нақты іс-қимыл жоспарын аяқтауды тапсырды. Бұл жоспар қаржы-экономикалық дағдарыс жағдайында өсімді сақтап, инвестиция көлемін төмендетпеуді көздейді.

Қасым-Жомарт Тоқаев стратегиялық мақсаттардың өзгермейтінін баса айтты: инфрақұрылымдық жобалар, цифрландыру, жасанды интеллектіні енгізу, ауыл шаруашылығы мен көлік-логистика салаларын дамыту жалғасады.

Келесі аптада бұл мәселелер бойынша кеңейтілген отырыс өткізіледі деп жоспарланып отыр.