قازاقستان تاعى بىر جاھاندىق جارىستا الدىڭعى قاتارعا شىعۋى مۇمكىن. قاراعاندى ماڭىنان تابىلعان جاڭا كەن ورنى ەلىمىزدىڭ سيرەك جەر ەلەمەنتتەرى بويىنشا الەمدە ۇشىنشى ورىن الاتىن ەلگە اينالۋىنا جول اشۋى ىقتيمال, دەپ حابارلايدى Shalqar.kz.

بۇل جاڭالىق وزبەكستاننىڭ سامارقاند قالاسىندا وتكەن ەۋروپالىق وداق – ورتالىق ازييا سامميتى قارساڭىندا جارييالاندى. تابيعي رەسۋرستار مەن گەوساياسي مۇددەلەر توعىسقان كەزەڭدە بۇل جاڭالىقتىڭ جارييالانۋى كەزدەيسوق ەمەس.

جاڭا كەن ورنى “جاڭا قازاقستان” دەپ اتالىپ وتىر. ونىڭ قويناۋىندا سمارتفونداردان باستاپ, دروندار مەن سپۋتنيكتەرگە دەيىن قاجەت بولاتىن سيرەك كەزدەسەتىن ەلەمەنتتەر — تسەريي, لانتان, نەوديم, يتتريي بار. بۇل مەتالدار – تسيفرلى تەحنولوگييالاردىڭ جۇرەگى.

قازىرگى باعالاۋ بويىنشا, مۇندا جالپى 935 400 توننا سيرەك جەر ەلەمەنتتەرى بار. كەن قورى 300 مەتر تەرەڭدىكتە, ار توننادا ورتا ەسەپپەن 700 گرامم سيرەك مەتالل بار دەپ بولجانۋدا.

الايدا ماماندار سالقىنقاندىلىقتى ساقتاۋعا شاقىرىپ وتىر. گەورگيي فرەيمان باستاعان تاۋەلسىز ساراپشىلار قاۋىمداستىعى بۇل مالىمەتتەردى ناقتىلاۋ ۇشىن الى دە بارلاۋ, زەرتتەۋ جانە ەكونوميكالىق تيىمدىلىكتى باعالاۋ قاجەت ەكەنىن ايتادى.

“كەن ورنى دەپ ايتۋ ۇشىن تەك شيكىزات قورى ەمەس, ونى وندىرۋدىڭ جولى, نارىقتاعى سۇرانىس, ەكولوگييالىق جانە ەكونوميكالىق مودەلьدەر ەسكەرىلۋى تيىس,” – دەيدى فرەيمان.

ايتا كەتەيىك, بۇل اۋماقتا بارلاۋ جۇمىستارى 2022 جىلى باستالىپ, العاشقى ناتيجەلەرى 2024 جىلدىڭ قازانىندا ۇكىمەتكە ۇسىنىلعان.

كەن ورنى تابىلعانى تۋرالى جاڭالىق ەۋرووداق سامميتى قارساڭىندا جارييالانعانى تەگىن ەمەس. ەۋرووداق قازاقستانمەن 2025–2026 جىلدارعا ارنالعان جاڭا جول كارتاسىن بەكىتتى. قۇجات گەولوگييالىق بارلاۋ, زەرتتەۋ جانە يننوۆاتسييا سالالارىنداعى سەرىكتەستىكتى كەڭەيتۋدى كوزدەيدى.

ەو ەلشىسى الەشكا سيمكيچتىڭ ايتۋىنشا:
“بۇل مالىمدەمە قازاقستاننىڭ ستراتەگييالىق شيكىزات جونىندەگى رولىن جاھاندىق دەڭگەيدە ناقتىلاپ بەردى.”