2025 جىلدىڭ سوڭىنا دەيىن ەلىمىزدەگى 125 تەمىرجول ۆوكزالى جاڭارتىلىپ, زاماناۋي تالاپتارعا ساي قايتا جابدىقتالادى. كوپتەگەن ۆوكزالدار وتكەن عاسىردا سالىنعان, ەندى ولار جولاۋشىلارعا ىڭعايلى بولۋ ۇشىن كۇردەلى جوندەۋدەن وتپەك, دەپ حابارلايدى Shalqar.kz.

جاڭعىرتىلاتىن نىسانداردىڭ قاتارىندا – ەلوردالىق “استانا-1” ۆوكزالى بار. بىلتىر بۇل ۆوكزال 2 ميلليوننان استام جولاۋشىنى قابىلداعان. الايدا عيماراتتىڭ كەيبىر بولىكتەرى توزىپ, جاڭارتۋدى قاجەت ەتەدى. جوبادا عيماراتتىڭ سىرتى قالانىڭ ساۋلەتتىك كەلبەتىنە ساي وزگەرتىلىپ, ىشكى ينجەنەرلىك جۇيەلەر مەن كۇتۋ زالدارى جاڭارتىلادى. Wi-Fi ينتەرنەت, ورت قاۋىپسىزدىگى مەن لاڭكەستىككە قارسى جۇيەلەر ورناتىلادى.

سونىمەن قاتار, شىعىس قازاقستان مەن اباي وبلىستارىنداعى 15 ۆوكزالدا دا قۇرىلىس جۇمىستارى جۇرگىزىلەدى. مىسالى, 87 جىلدىق تاريحى بار “وسكەمەن-1” ۆوكزالى تولىقتاي جوندەۋدەن وتەدى. مۇندا قوسىمشا پەررونعا اپاراتىن جابىق وتكەل سالىنىپ, جاڭا ساقتاۋ كامەرالارى, دەمالىس ورىندارى مەن زاماناۋي قوعامدىق تاماقتانۋ ايماقتارى اشىلادى.

مۇمكىندىگى شەكتەۋلى جاندارعا ارنالعان ينفراقۇرىلىم جەتىلدىرىلىپ, انا مەن بالا بولمەلەرىمەن جابدىقتاۋ جوسپارلانعان. “قازاقستان تەمىر جولى” كومپانيياسى بۇل جۇمىستاردى 2025 جىلدىڭ سوڭىنا دەيىن تولىق اياقتاۋدى كوزدەپ وتىر.