Астанадағы Бейбітшілік және келісім сарайында Қазақстан халқы Ассамблеясы Кеңесінің кеңейтілген отырысы өтті. Жиын ҚХА-ның XXXIV сессиясы қарсаңында ұйымдастырылып, елдегі этносаралық татулық пен қоғамдық тұрақтылық мәселелері кеңінен талқыланды, деп хабарлайды Shalqar.kz тілшісі Сыртқы Істер министрлігіне сілтеме жасап.

Кеңейтілген отырысқа Президенттің көмекшісі Арман Қырықбаев, Парламент депутаттары, Мәдениет және ақпарат вице-министрі Евгений Кочетов, ҚХА Кеңесінің мүшелері мен республикалық этномәдени бірлестіктердің өкілдері қатысты.

Кездесу барысында Ассамблеяның 30 жылдағы жетістіктері сараланып, «Әралуандықтағы бірлік» қағидатының қоғамдағы маңызы ерекше атап өтілді.

Кеңесте этномәдени бірлестіктерді дамыту, ҚХА Ақсақалдар мен Аналар кеңестерінің жұмысы, қайырымдылық, этномедиация, ғылыми сараптама және жастармен жұмыс бағыттарын жандандыру мәселелері күн тәртібіне қойылды.

Жиын – бірлік пен тұрақтылықты сақтау жолындағы жаңа бастамаларға серпін беретін маңызды диалог алаңына айналды.