قىرعىزستاندا ەلەكتر سكۋتەر مەن موپەد تىزگىندەيتىندەرگە جاڭا تالاپ قويىلۋى مۇمكىن. ەل پارلامەنتىنىڭ دەپۋتاتى داستان بەكەشەۆ بۇل كولىكتەردى جۇرگىزۋ ۇشىن ارنايى جۇرگىزۋشى كۋالىگىن ەنگىزۋدى ۇسىندى, دەپ حابارلايدى Shalqar.kz.

دەپۋتاتتىڭ ايتۋىنشا, تۇرعىنداردان ساعاتىنا 50 شاقىرىمنان جوعارى جىلدامدىقپەن جۇرەتىن قۇرىلعىلارعا باقىلاۋدى كۇشەيتۋ تۋرالى وتىنىشتەر جيى تۇسىپ جاتىر. سەبەبى بۇگىندە تروتۋار مەن جولدا زىمىراپ جۇرگەن سكۋتەرلەر مەن موپەدتەر – كادىمگى كولىك قۇرالدارىنا اينالعان.

— قازىر كەز كەلگەن ادام سكۋتەر ساتىپ الىپ, جولعا شىعىپ كەتە بەرەدى. جاسوسپىرىمدەر مەن تىپتى جۇرگىزۋگە رۇقساتى جوق ادامدار دا مىنىپ جۇر. بۇل – تارتىپسىزدىك. ەگەر قازىردەن باستاپ قاداعالاماساق, ەرتەڭ كەش بولادى, — دەدى دەپۋتات جوگوركۋ كەنەش وتىرىسىندا.

ول پرەزيدەنت پەن ۇكىمەتكە ۇندەۋ جولداپ, «ۋناا» مەملەكەتتىك مەكەمەسىنە جاڭا جۇيە – جەكە كولىكتەرگە جۇرگىزۋشى كۋالىگى بەرۋدى زاڭداستىرۋدى تاپسىرسا دەگەن ۇسىنىس ايتتى.

ايتا كەتەيىك, قىرعىزستاندا جۋىردا اليمەنت پەن قارىزدى نوتاريۋس ارقىلى وندىرىپ الۋ جۇيەسى دە ەنگىزىلگەن بولاتىن.