قازاقستاندىق دەسانتشىلار ۇلى جەڭىستىڭ 80 جىلدىعىنا ارنالعان ماسكەۋدەگى 9 مامىر پارادىنا قاتىسۋ ۇشىن رەسەي استاناسىنا اتتاندى, دەپ حابارلايدى Shalqar.kz.

قورعانىس مينيسترلىگىنىڭ مالىمەتىنە سايكەس, ەلىمىزدىڭ اتىنان سالتاناتتى شەرۋگە كەڭەس وداعىنىڭ باتىرى, گەنەرال-مايور يۆان پانفيلوۆتىڭ ەسىمىن يەلەنگەن 37-دەسانتتىق-شابۋىلداۋ بريگاداسىنىڭ اسكەري قىزمەتشىلەرى قاتىسادى.

چكالوۆسكيي اسكەري اۋەجايىندا قازاقستاندىق جاۋىنگەرلەردى رەسەيدەگى قازاقستان قورعانىس مينيسترلىگىنىڭ اتتاشەسى, گەنەرال-لەيتەنانت تالعات قويباقوۆ قارسى الىپ, ماڭىزدى تاريحي شارادا جوعارى دەڭگەيدە ونەر كورسەتۋگە ساتتىلىك تىلەدى.

پارادتىق لەكتىڭ باسىندا ەكىنشى دارەجەلى “ايبىن” وردەنىنىڭ جانە “جاۋىنگەرلىك ەرلىگى ۇشىن” مەدالىنىڭ يەگەرى, پولكوۆنيك الماس تولەگەنوۆ جۇرمەك. جالپى قۇرامدا 80 اسكەري قىزمەتشى بار: ولاردىڭ قاتارىندا 11 وفيتسەر, 24 كەلىسىمشارت نەگىزىندەگى سارباز جانە 45 مەرزىمدى اسكەري قىزمەتشىلەر بار.

مينيسترلىكتىڭ دەرەگىنشە, 37-بريگادا ۇقشۇ-نىڭ جەدەل دەن قويۋ ۇجىمدىق كۇشتەرىنىڭ قۇرامىندا جانە اردايىم جوعارى دايىندىقتا ۇستالادى. بەيبىت ۋاقىتتا ولار قوعامدىق تارتىپتى ساقتاۋ, مەملەكەتتىك شەكارانى قورعاۋ جانە توتەنشە جاعدايلار كەزىندە كومەك كورسەتۋ سيياقتى ماڭىزدى مىندەتتەردى ورىندايدى.