بۇگىن, 28 ساۋىر – دۇنيەجۇزىلىك ەڭبەكتى قورعاۋ كۇنى. بۇل كۇن جۇمىسشىلاردىڭ قۇقىقتارىن قورعاۋ, ەڭبەك قاۋىپسىزدىگىن نىعايتۋ ماسەلەلەرىنە جاھاندىق نازار اۋدارۋعا ارنالعان, دەپ حابارلايدى Shalqar.kz.

قازاقستاندا سوڭعى بەس جىل ىشىندە وندىرىستىك جاراقاتتانۋ دەڭگەيى 6,3%-عا, ال قازا تاپقان جۇمىسشىلار سانى 2,9%-عا ازايدى. ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, بۇل وڭ وزگەرىستەر جوسپارلى تۇردە قابىلدانعان شارالاردىڭ ناتيجەسى.

بيىلعى ەڭبەكتى قورعاۋ كۇنىنىڭ تاقىرىبى — “ەڭبەك قاۋىپسىزدىگى مەن گيگيەناسىنا رەۆوليۋتسييالىق كوزقاراستار: جاساندى ينتەللەكت پەن تسيفرلاندىرۋدىڭ رولى”. الەمنىڭ تۇكپىر-تۇكپىرىندە وسى باعىتتا تۇرلى ىس-شارالار وتىپ جاتىر.

الايدا حالىقارالىق ەڭبەك ۇيىمىنىڭ دەرەكتەرىنە قاراعاندا, پروبلەما الى دە وزەكتى: الەمدە جىل سايىن 270 ميلليون جازاتايىم وقيعا تىركەلىپ, 2 ميلليوننان استام ادام كاسىپتىك اۋرۋلار سالدارىنان كوز جۇمادى.

قازاقستانداعى احۋال:
 • جىل سايىن 1400-دەن استام وندىرىستىك جازاتايىم وقيعا بولادى;
 • ونىڭ 200-گە جۋىعى ادام ولىمىمەن اياقتالادى;
 • ەڭ كوپ زارداپ شەككەندەر تاۋ-كەن مەتاللۋرگييا كەشەنى (15,3%) مەن قۇرىلىس سالاسىندا (12%).

بۇگىندە ەلىمىزدە 470 مىڭنان استام ادام زيياندى ەڭبەك جاعدايىندا جۇمىس ىستەيدى. 2024 جىلى وسىنداي ەڭبەك ۇشىن جۇمىس بەرۋشىلەر 297,4 ملرد تەڭگە كولەمىندە وتەماقى تولەگەن.

ەڭبەكمينى قاۋىپسىز ەڭبەك جاعدايلارىن جاقسارتۋ ۇشىن:
 • 7,7 مىڭنان استام وندىرىستىك نىساندى اتتەستاتتاۋدان وتكىزدى;
 • 1042 جازاتايىم وقيعا تۋرالى ىس قوزعاپ, 215 قىلمىستىق ىس اشتى;
 • 3262 كاسىپورىندا ەڭبەك قاۋىپسىزدىگى ستاندارتتارىن ەنگىزدى.

سونىمەن قاتار, 2019 جىلدان بەرى Vision Zero (“نولدىك جاراقات”) تۇجىرىمداماسى ەنگىزىلۋدە. بۇگىندە 605 كاسىپورىن وعان قوسىلعان. ال 2024 جىلدان باستاپ زيياندى جاعدايدا جۇمىس ىستەگەندەر ۇشىن ارنايى الەۋمەتتىك تولەمدەر بەرىلە باستادى.

قازاقستاندا قاۋىپسىز ەڭبەك ورتاسىن قالىپتاستىرۋعا باعىتتالعان 2030 جىلعا دەيىنگى جاڭا تۇجىرىمداما ىسكە اسىرىلۋدا. ونىڭ اياسىندا تسيفرلىق ەڭبەك كارتالارى ەنگىزىلىپ, وندىرىستەگى تاۋەكەلدەردى ناقتى ۋاقىت رەجيمىندە باقىلاۋ مۇمكىندىگى جاسالدى.

ال 2025 جىلى 28-30 مامىر ارالىعىندا ەڭبەكتى قورعاۋ جانە ونەركاسىپتىك قاۋىپسىزدىك ماسەلەلەرىنە ارنالعان حالىقارالىق كونفەرەنتسييا مەن كورمە وتەدى.