شەتەلگە دەمالىسقا شىقپاس بۇرىن چەمودان ەمەس, الدىمەن ەكپە جايىن ويلاڭىز. استانا قالاسىنىڭ سانيتارييالىق-ەپيدەميولوگييالىق باقىلاۋ دەپارتامەنتى تۇرعىندارعا شەت مەملەكەتتەرگە ساياحاتتاماس بۇرىن مىندەتتى جانە ۇسىنىلاتىن ەكپەلەر تۋرالى ەسكەرتۋ جاسادى, دەپ حابارلايدى Shalqar.kz.

ۆەدومستۆو وكىلى جاننا پىراليەۆانىڭ ايتۋىنشا, الەمنىڭ كوپتەگەن وڭىرلەرىندە اۋا, سۋ, تاعام نەمەسە ماسا ارقىلى تارالاتىن قاۋىپتى جۇقپالى اۋرۋلار الى دە كوپ. ۆاكتسينا – وزىڭىزدى قورعاۋدىڭ ەڭ تيىمدى جولى.

«جاقسى ساياحاتتىڭ كەپىلى – دەنساۋلىقتى قورعاۋدان باستالادى. كەيبىر ۆاكتسينالار يممۋنيتەت قالىپتاستىرۋ ۇشىن بىرنەشە اپتا قاجەت ەتەدى, سوندىقتان ساپار الدىندا 4–8 اپتا بۇرىن ەكپە العان دۇرىس», – دەيدى دارىگەر.

قاي ەلگە قانداي ەكپە قاجەت?
 • سارى بەزگەككە قارسى ەكپە — افريكا مەن وڭتۇستىك امەريكانىڭ بىرنەشە ەلىندە مىندەتتى (مىسالى, برازيلييا, كولۋمبييا, نيگەرييا).
 • مەنينگوكوكك ينفەكتسيياسى — ساۋد ارابيياسى سيياقتى ەلدەرگە بارۋشىلارعا تالاپ ەتىلەدى.
 • ىش سۇزەگى — افريكا, وڭتۇستىك امەريكا جانە ازييا ەلدەرىنە جول تارتار الدىندا ۇسىنىلادى.
 • كەنە ەنتسەفاليتى — قازاقستاننىڭ سولتۇستىك وڭىرلەرى, رەسەي جانە ەۋروپانىڭ كەي ايماقتارىندا جيى كەزدەسەدى.

دارىگەر ساياحاتشىلارعا ەكپەدەن بولەك, باسقا دا ساقتىق شارالارىن ەسكەرۋدى ۇسىنادى: تازا سۋ ىشۋ, جەكە گيگيەنانى ساقتاۋ, اشىق اۋادا سەرۋەندەۋ كەزىندە قورعانىش قۇرالدارىن پايدالانۋ.