23 - 24 мамыр – мектеппен қоштасатын күн. Биыл соңғы қоңырау дәстүрлі 25 мамырға тура келмейді. Себебі 25-і жексенбіге түсіп отыр. Осыған байланысты 11-сынып түлектері үшін мерекелік іс-шараны мектептер өз таңдауы бойынша 23 не 24 мамырда өткізетін болды. Бұл туралы Оқу-ағарту министрлігі мәлімдеді, деп хабарлайды Shalqar.kz.

Алайда, биыл да ата-аналар мен оқушыларға бір ескерту бар:
Шамадан тыс сән-салтанатқа жол жоқ. Министрлік мектеп қабырғасынан тыс шеру, лимузин, ақша жинау, сәнді мейрамханаларда тойлау сияқты әрекеттерге тыйым салынатынын тағы бір еске салды. Мұндай шешім – барлық балаға тең мүмкіндік пен қауіпсіз орта қалыптастыру үшін қабылданған.

3,9 миллион оқушы оқу жылын аяқтайды, оның ішінде 217 мыңнан астамы – 11-сынып түлектері.

Соңғы оқу күні – 23 мамыр. Бұл күні еліміздегі барлық мектепте «Білімім – Отаныма» атты бірыңғай сынып сағаты өтеді. Бұл тек қоштасу емес – өткен оқу жылына көз жүгіртіп, жетістіктер мен сәттерді еске алатын маңызды күн.

Министрлік өкілдерінің айтуынша, бұл шара оқушыларға патриотизм, білімге құштарлық пен еңбекқорлықты дәріптейді. Өйткені әр баланың жетістігі – ел болашағының кепілі.