23 ne 24 mamır – mekteppen qoştasatın kün. Biıl soñğı qoñırau dästürli 25 mamırğa tura kelmeydi. Sebebi 25-i jeksenbige tüsip otır. Osığan baylanıstı 11-sınıp tülekteri üşin merekelik is-şaranı mektepter öz tañdauı boyınşa 23 ne 24 mamırda ötkizetin boldı. Bwl turalı Oqu-ağartu ministrligi mälimdedi, dep habarlaydı Shalqar.kz.

Alayda, biıl da ata-analar men oquşılarğa bir eskertu bar:
Şamadan tıs sän-saltanatqa jol joq. Ministrlik mektep qabırğasınan tıs şeru, limuzin, aqşa jinau, sändi meyramhanalarda toylau siyaqtı äreketterge tıyım salınatının tağı bir eske saldı. Mwnday şeşim – barlıq balağa teñ mümkindik pen qauipsiz orta qalıptastıru üşin qabıldanğan.

3,9 million oquşı oqu jılın ayaqtaydı, onıñ işinde 217 mıñnan astamı – 11-sınıp tülekteri.

Soñğı oqu küni – 23 mamır. Bwl küni elimizdegi barlıq mektepte «Bilimim – Otanıma» attı birıñğay sınıp sağatı ötedi. Bwl tek qoştasu emes – ötken oqu jılına köz jügirtip, jetistikter men sätterdi eske alatın mañızdı kün.

Ministrlik ökilderiniñ aytuınşa, bwl şara oquşılarğa patriotizm, bilimge qwştarlıq pen eñbekqorlıqtı däripteydi. Öytkeni är balanıñ jetistigi – el bolaşağınıñ kepili.