Қазақстанның Ұлттық банкі “Есте қалатын оқиғалар мен біртуар адамдар” сериясынан Ұлы Жеңістің 80 жылдығына арналған коллекциялық монеталарды шығарады, деп хабарлайды Shalqar.kz.

Номиналы 200 және 1000 теңгелік монеталар еліміздің тарихындағы маңызды оқиғаларды еске түсіретін символ ретінде шығарылмақ. Монеталардың бетінде ерлікпен қаза тапқан қаһармандарға арналып мәңгілік алау бейнеленген. Сонымен қатар, 80 санындағы ою-өрнек жеңіс лентасын сипаттайды, бұл Қазақстан Республикасының Мемлекеттік Туының элементтерімен үндеседі.

1 000 теңгелік монета алтын жалатылған 925 сынамалы күмістен жасалған және таралымы тек 2 000 дана болады. Ал 200 теңгелік монеталар Қазақстан аумағында еркін айналымда болады және олар қолданыстағы ақша түрлері сияқты айналымға түседі.

Бұл коллекциялық монеталар Ұлы Жеңістің 80 жылдығын атап өту аясында еліміздегі патриоттық рухты нығайтып, жастарға тарихи мұраны сақтап қалудың маңыздылығын еске салады.