Сингапурде өтіп жатқан көркем гимнастикадан Азия чемпионатында қазақстандық жас спортшы Айбота Ертайқызы алтын медаль жеңіп алып, ел мерейін үстем етті. Ол лентамен өнер көрсету сайысында 28.150 ұпай жинап, барлық қарсыласын артта қалдырды, деп хабарлайды Shalqar.kz.

Бұл жеңіс жайлы Қазақстанның спорт комитеті хабарлады.

Айботаның басты қарсыластары – өзбекстандық Наталья Усова (27.550 ұпай) және жапониялық Рейна Матсусаки (27.200 ұпай) тиісінше екінші және үшінші орындарды еншіледі. Ал тағы бір қазақстандық гимнаст Айым Мейіржанова 27.000 ұпаймен төртінші орыннан көрінді.

Айбота Ертайқызы бұл жеңісімен тоқтап қалмады: көпсайыс нәтижесі бойынша да қола медаль иеленіп, төрт жаттығудан 82.200 ұпай жинады.

Айбота — 2004 жылы туған, жас та болса, ел намысын биік деңгейде қорғап жүрген спортшы. Бұған дейін де Ташкентте өткен құрлықтық жарыста чемпион атанып, бірнеше мәрте күміс пен қола медальдар алған.