Бағдатта өткен Араб мемлекеттері лигасының жыл сайынғы саммитінде араб елдерінің басшылары Израиль мен ХАМАС арасындағы қарулы қақтығысты тоқтатуды талап етті. Олар тек мәлімдеме жасап қана қоймай, Газа секторын қалпына келтіруге нақты үлес қосуға ниетті екендерін де білдірді, деп хабарлайды Shalqar.kz.

Кездесуге Катар әмірі шейх Тамим бен Хамад Әл Тани, Мысыр президенті Абдель Фаттах ас-Сиси, сондай-ақ қонақ ретінде Испания премьер-министрі Педро Санчес пен БҰҰ Бас хатшысы Антониу Гутерриш қатысты.

Ирак премьер-министрі Мұхаммед Шиа әл-Судани Газаға гуманитарлық көмекті кедергісіз жеткізуге шақырып, бұл аймақтың бірнеше айдан бері толық қоршауда екенін еске салды. Ол Израиль әрекетін “адамзат тарихындағы ең жантүршігерлік қақтығыс” деп атады.

Ирак Газа секторын қалпына келтіру үшін арнайы араб қорын құруды ұсынды. Бұл қор арқылы Ирак 20 миллион доллар көмек беруге дайын екенін мәлімдеді. Сонымен қатар, Ливанға да осындай көлемде қаржы аударылады.