Соңғы уақытта әлеуметтік желілерде сырт көзге күлкілі мультфильм секілді көрінетін, бірақ астарында баланың санасына теріс әсер ететін бейнероликтер көбейіп кетті. Бұл туралы Оқу-ағарту министрлігінің Балалардың құқықтарын қорғау комитеті ресми түрде ескерту жасады, деп хабарлайды Shalqar.kz.

Мәселе неде?

«Brainrot» (аудармасы — «ми шіруі») хэштегімен тарап жатқан қысқа анимациялық видеолардың ұзақтығы небәрі 15–45 секундты құрайды. Бірақ бұл қысқа уақыт ішінде баланың психикасына әсер ететін вербалдық триггерлер (мән-мағынасыз, бірақ қайталанатын және есте қалатын сөздер) жасырылады.

Мысалы:
 • «Траллалеро траллаеро» — шын мәнінде діни қорлау элементтері бар сөздер.
 • «Бомбардино крокадило — мен Палестинадағы балаларға бомба тастағанды ұнатамын» — жасырын дыбыстық деңгейде берілетін зорлық-зомбылықты насихаттайтын фраза.

Қауіп неде?
Комитет мәліметінше, мұндай контент:
 • Баланың адамгершілік құндылықтарына кері әсер етеді;
 • Агрессивті мінез-құлыққа итермелеуі мүмкін;
 • Психоэмоциялық саулыққа қауіп төндіреді.

Министрлік қандай шаралар қабылдап жатыр?
Оқу-ағарту министрлігі бұл мәселеге қатысты заңнаманы жетілдіру бойынша ұсыныстар дайындап, Мәдениет және ақпарат министрлігіне және Ішкі істер министрлігіне жолдады.

Ата-аналарға кеңес:
 • Баланың не көріп, кіммен байланысып жүргенін бақылаңыз;
 • Ашық әңгімелесіп, күмәнді видеолар жайлы пікірлесіңіз;
 • Күмән тудыратын бейнематериалдар байқалса, бірден құзырлы органдарға хабарлаңыз.

Ұмытпаңыз: балаңыздың қауіпсіздігі — сіздің саналы араласуыңызға тікелей байланысты!