دانييا بيلىگى بالالاردىڭ دەنساۋلىعىنا الاڭداپ, ۇلكەن قادامعا بارماق. ەلدىڭ ەكونوميكا مينيسترلىگى ەندى 15 جاسقا دەيىنگى بالالارعا زيياندى تاعامدار مەن گازدى سۋسىنداردى جارنامالاۋعا شەكتەۋ قويۋدى جوسپارلاپ وتىر. ەڭ باستىسى – بۇل تىيىم اتاقتى ادامدار مەن كومپانييالاردىڭ قاتىسۋىمەن جاسالاتىن جارنامالارعا دا قاتىستى بولادى, دەپ حابارلايدى Shalqar.kz.

جاڭا باستامانىڭ ماقساتى – ارتىق سالماقپەن كۇرەسۋ. قازىرگى تاڭدا دانييادا دا سەمىزدىككە شالدىققان بالالار سانى وسىپ كەلەدى. مامانداردىڭ ايتۋىنشا, ەگەر جاعداي وزگەرمەسە, 2045 جىلعا قاراي ەل تۇرعىندارىنىڭ جارتىسى سەمىزدىككە تاپ بولۋى مۇمكىن.

دۇنيەجۇزىلىك دەنساۋلىق ساقتاۋ ۇيىمى دا بۇل ۇردىستى راستاپ وتىر: بالالار زيياندى ونىمدەردىڭ جارناماسىنا تەز سەنەدى. اسىرەسە, تانىمال تۇلعالار مەن ينفليۋەنسەرلەردىڭ سوزى ولار ۇشىن زاڭمەن تەڭ. وسى سەبەپتى دانييا ۇكىمەتى جارناما الەمىندەگى “تاتتى وتىرىككە” شەكتەۋ قويماق.