بۇگىن – قازاق ارحەولوگيياسىنىڭ نەگىزىن قالاعان, «التىن ادامدى» العاش بولىپ تاپقان كورنەكتى عالىم كەمەل اقىشەۆتىڭ تۋعانىنا 101 جىل. ول – قازاقستان عىلىمىنىڭ الىپ تۇلعاسى, ارحەولوگييانى جاڭا دەڭگەيگە كوتەرگەن تاريحي قايراتكەر, دەپ حابارلايدى Shalqar.kz.

1924 جىلى پاۆلودار وبلىسى, باياناۋىل وڭىرىندە دۇنيەگە كەلگەن كەمەل اقىشەۆ جاستايىنان بىلىم مەن ىزدەنىسكە بەت بۇردى. سوعىس جىلدارى مايدان شەبىندە بولعانىمەن, كەيىن عىلىم جولىنا تۇسىپ, كونە داۋىر قۇپييالارىن زەرتتەۋگە كىرىستى.

كەمەل اقىشەۆتىڭ ەسىمى ەسىك قورعانىنان تابىلعان «التىن اداممەن» تىعىز بايلانىستى. بۇل جاڭالىق قازاقستان تاريحىن الەمگە ايگىلى ەتتى. بۇدان بولەك, عالىم بەسشاتىر, وتىرار, شىلىكتى سيياقتى ەجەلگى ەسكەرتكىشتەردى زەرتتەپ, ەرتە تەمىر داۋىرىنىڭ مادەنيەتىن عىلىمي تۇرعىدان نەگىزدەدى.

2000 جىلى ول ل.ن. گۋميلەۆ اتىنداعى ەۋرازييا ۇلتتىق ۋنيۆەرسيتەتىندە ارحەولوگييالىق رەكونسترۋكتسييا لابوراتوريياسىن قۇردى. زەرتتەۋشىلىك ەڭبەگى ەلەنىپ, قازاقستان مەملەكەتتىك سىيلىعى مەن «پاراسات» وردەنىن يەلەندى.

بۇگىندە ەلورداداعى №69 مەكتەپ-گيمنازيياسى عالىمنىڭ ەسىمىمەن اتالادى. ۇلت تاريحىنىڭ شەجىرەسىن جاڭعىرتقان تۇلعانىڭ ەڭبەگى ەشقاشان ۇمىتىلماق ەمەس.