Австралияның оңтүстік-шығыс бөлігіндегі жойқын су тасқыны бүкіл елді есеңгіретіп кетті. Үш күн бойы толассыз жауған жаңбырдың салдарынан кем дегенде бес адам қаза тауып, 10 мыңнан астам үй мен ғимарат су астында қалды, деп хабарлайды Shalqar.kz Reuters ақпарат агенттігіне сілтеме жасап.


Премьер-министр Энтони Албанезе ел үкіметінің зардап шеккен өңірлерге көмек көрсетіп жатқанын, тазалау жұмыстары қарқынды жүріп жатқанын мәлімдеді. Су тасқынының соңғы құрбаны – 80 жастағы ер адам, оның денесі ең көп зардап шеккен аймақтардың бірінен табылған.

Қазір жүздеген тұрғын эвакуациялық орталықтарда бас сауғалап отыр. Табиғат апаты 50 мыңға жуық адамның байланыстан ажырауына себеп болған. Аумақтар оқшауланып, инфрақұрылым бұзылған.

Климаттанушылар бұл апаттың себебін жаһандық климат өзгерісімен байланыстырады. Табиғи апаттардың жиілеуі – болашақта мұндай оқиғалардың тағы да қайталану қаупі бар екенін көрсетеді.