Әзербайжан астанасы Бакуде өтіп жатқан шағын футболдан әлем чемпионатында бүгін Қазақстан құрамасы маңызды матчқа шығады. Біздің жігіттер F тобындағы кезекті қарсыласы – АҚШ құрамасымен күш сынасады. Қарсылас осал емес, бірақ жеңіс үміті де бар. Матч Астана уақытымен 21:35-те басталады, ойынды «Qazsport» телеарнасынан тікелей тамашалауға болады, деп хабарлайды Shalqar.kz.

Қазақстан құрамасы бұған дейін Польшамен ойнап, 1:2 есебімен жеңілген, ал Босния және Герцоговинамен кездесу 1:1 есебімен тең аяқталды. Енді топтан шығу үшін АҚШ-пен ойындағы нәтиже шешуші болмақ.

Жалпы, биылғы чемпионатқа 32 құрама қатысып жатыр. Жарыс Бүкіләлемдік шағын футбол федерациясының (WMF) бастамасымен ұйымдастырылған. Айтулы дода 1 маусымда өз мәресіне жетеді.

Айта кетейік, Қазақстан құрамасы өткен, 2023 жылғы чемпионатта плей-офф кезеңінде Румынияға пенальти сериясында есе жіберіп (2:2, пенальти 11:12), ширек финалға жете алмаған еді.

Әлем чемпионаты алғаш рет 2015 жылы өткізілді және сол уақыттан бері әр екі жыл сайын өтеді. Турнирлердің географиясы да ауқымды: Тунис, Аустралия, БАӘ – барлығы осы жарыстың алаңына айналды. 2021 жылы пандемияға байланысты турнир өтпей қалды.