ازەربايجان استاناسى باكۋدە وتىپ جاتقان شاعىن فۋتبولدان الەم چەمپيوناتىندا بۇگىن قازاقستان قۇراماسى ماڭىزدى ماتچقا شىعادى. بىزدىڭ جىگىتتەر F توبىنداعى كەزەكتى قارسىلاسى – اقش قۇراماسىمەن كۇش سىناسادى. قارسىلاس وسال ەمەس, بىراق جەڭىس ۇمىتى دە بار. ماتچ استانا ۋاقىتىمەن 21:35-تە باستالادى, ويىندى «Qazsport» تەلەارناسىنان تىكەلەي تاماشالاۋعا بولادى, دەپ حابارلايدى Shalqar.kz.

قازاقستان قۇراماسى بۇعان دەيىن پولьشامەن ويناپ, 1:2 ەسەبىمەن جەڭىلگەن, ال بوسنييا جانە گەرتسوگوۆينامەن كەزدەسۋ 1:1 ەسەبىمەن تەڭ اياقتالدى. ەندى توپتان شىعۋ ۇشىن اقش-پەن ويىنداعى ناتيجە شەشۋشى بولماق.

جالپى, بيىلعى چەمپيوناتقا 32 قۇراما قاتىسىپ جاتىر. جارىس بۇكىلالەمدىك شاعىن فۋتبول فەدەراتسيياسىنىڭ (WMF) باستاماسىمەن ۇيىمداستىرىلعان. ايتۋلى دودا 1 ماۋسىمدا وز مارەسىنە جەتەدى.

ايتا كەتەيىك, قازاقستان قۇراماسى وتكەن, 2023 جىلعى چەمپيوناتتا پلەي-وفف كەزەڭىندە رۋمىنيياعا پەنالьتي سەريياسىندا ەسە جىبەرىپ (2:2, پەنالьتي 11:12), شيرەك فينالعا جەتە الماعان ەدى.

الەم چەمپيوناتى العاش رەت 2015 جىلى وتكىزىلدى جانە سول ۋاقىتتان بەرى ار ەكى جىل سايىن وتەدى. تۋرنيرلەردىڭ گەوگرافيياسى دا اۋقىمدى: تۋنيس, اۋسترالييا, باا – بارلىعى وسى جارىستىڭ الاڭىنا اينالدى. 2021 جىلى پاندەميياعا بايلانىستى تۋرنير وتپەي قالدى.