Алматы моноорталықты қаладан полиорталықты мегаполиске айналады. Қала әкімдігі 2040 жылға дейінгі бас жоспар аясында бес ірі полиорталық құруды көздеп отыр. Бұл – Алматының болашағына бағытталған ауқымды қадам, деп хабарлайды Shalqar.kz.

Жаңа жобаның мақсаты – іскерлік белсенділікті бір орталықтан бөліп, қаланың әр аймағына даму серпіні беру. Сонымен қатар, көлік жүктемесін азайтып, қала тұрғындарына қолайлы орта қалыптастыру.

Жаңа полиорталықтар қайда құрылады және не болады?

Солтүстік полиорталығы — Алматы-1 вокзалының маңында
Қызмет көрсету секторын дамытуға арналған. Шағын бизнеске арналған кеңселер, Үлкен Алматы каналы мен Баум тоғайы бойында скверлер мен демалыс орындары салынады.

Батыс полиорталығы — Алматы-3 вокзалы мен Боралдай көлік хабы аумағында
90 гектарлық саябақ, этнографиялық “Сақ қорғандары” паркі, жаңа көпсалалы аурухана кешені мен инфрақұрылым нысандары жоспарланған.

Оңтүстік-батыс полиорталығы — Райымбек даңғылы мен Алатау көшесінің қиылысы
Өндірістік мини-парктер, сауда, логистика және әкімшілік-іскерлік орталықтар орналаспақ.

Тарихи орталық — “Алтын шаршы” аймағы
Байтұрсынов, Абай, Зенков және Жібек Жолы көшелерімен шектелген аумақта тарихи-мәдени ғимараттар қалпына келтіріледі. Өндіріс нысандары қарастырылмаған.

Шығыс қақпа полиорталығы — Талғар мен Құлжа тас жолдарының қиылысы
Алматының жаңа логистикалық орталығы осында орналасады.

Жаңа полиорталықтар қаланың теңгерімді дамуын қамтамасыз етіп, әр ауданның өз “шағын мегаполисіне” айналуына мүмкіндік береді.