الماتى مونوورتالىقتى قالادان پوليورتالىقتى مەگاپوليسكە اينالادى. قالا اكىمدىگى 2040 جىلعا دەيىنگى باس جوسپار اياسىندا بەس ىرى پوليورتالىق قۇرۋدى كوزدەپ وتىر. بۇل – الماتىنىڭ بولاشاعىنا باعىتتالعان اۋقىمدى قادام, دەپ حابارلايدى Shalqar.kz.

جاڭا جوبانىڭ ماقساتى – ىسكەرلىك بەلسەندىلىكتى بىر ورتالىقتان بولىپ, قالانىڭ ار ايماعىنا دامۋ سەرپىنى بەرۋ. سونىمەن قاتار, كولىك جۇكتەمەسىن ازايتىپ, قالا تۇرعىندارىنا قولايلى ورتا قالىپتاستىرۋ.

جاڭا پوليورتالىقتار قايدا قۇرىلادى جانە نە بولادى?

سولتۇستىك پوليورتالىعى — الماتى-1 ۆوكزالىنىڭ ماڭىندا
قىزمەت كورسەتۋ سەكتورىن دامىتۋعا ارنالعان. شاعىن بيزنەسكە ارنالعان كەڭسەلەر, ۇلكەن الماتى كانالى مەن باۋم توعايى بويىندا سكۆەرلەر مەن دەمالىس ورىندارى سالىنادى.

باتىس پوليورتالىعى — الماتى-3 ۆوكزالى مەن بورالداي كولىك حابى اۋماعىندا
90 گەكتارلىق ساياباق, ەتنوگرافييالىق “ساق قورعاندارى” پاركى, جاڭا كوپسالالى اۋرۋحانا كەشەنى مەن ينفراقۇرىلىم نىساندارى جوسپارلانعان.

وڭتۇستىك-باتىس پوليورتالىعى — رايىمبەك داڭعىلى مەن الاتاۋ كوشەسىنىڭ قيىلىسى
وندىرىستىك ميني-پاركتەر, ساۋدا, لوگيستيكا جانە اكىمشىلىك-ىسكەرلىك ورتالىقتار ورنالاسپاق.

تاريحي ورتالىق — “التىن شارشى” ايماعى
بايتۇرسىنوۆ, اباي, زەنكوۆ جانە جىبەك جولى كوشەلەرىمەن شەكتەلگەن اۋماقتا تاريحي-مادەني عيماراتتار قالپىنا كەلتىرىلەدى. وندىرىس نىساندارى قاراستىرىلماعان.

شىعىس قاقپا پوليورتالىعى — تالعار مەن قۇلجا تاس جولدارىنىڭ قيىلىسى
الماتىنىڭ جاڭا لوگيستيكالىق ورتالىعى وسىندا ورنالاسادى.

جاڭا پوليورتالىقتار قالانىڭ تەڭگەرىمدى دامۋىن قامتاماسىز ەتىپ, ار اۋداننىڭ وز “شاعىن مەگاپوليسىنە” اينالۋىنا مۇمكىندىك بەرەدى.