بۇگىن ادامزات تاريحىنداعى تۇڭعىش عارىش ايلاعى — «بايقوڭىردىڭ» قۇرىلعانىنا 70 جىل تولدى. 1955 جىلى ىرگەتاسى قالانعان بۇل نىسان قازاقستان عانا ەمەس, بۇكىل الەم ۇشىن ماڭىزدى ستراتەگييالىق جانە عىلىمي كەشەن سانالادى, دەپ حابارلايدى Shalqar.kz.

مەرەيتوي قارساڭىندا مەملەكەت باسشىسى قاسىم-جومارت توقاەۆ بايقوڭىر عارىش ايلاعىنىڭ قىزمەتكەرلەرى مەن ارداگەرلەرىن كاسىبي مەرەكەمەن قۇتتىقتادى.

«بارشاڭىزدى «بايقوڭىر» عارىش ايلاعىنىڭ قۇرىلعانىنا 70 جىل تولۋىمەن قۇتتىقتايمىن! 1957 جىلى دال وسى ارادان جاساندى جەر سەرىگى ۇشىرىلىپ, عارىشتى يگەرۋ داۋىرى باستالدى. كوپ ۇزاماي, 1961 جىلى ايلاقتان تۇڭعىش عارىشكەر يۋريي گاگارين كوك جۇزىنە اتتاندى. بۇل تاريحي وقيعا جاھان جۇرتشىلىعىن بىرىكتىرىپ, ادامزاتتىڭ عىلىم مەن وركەنيەت پروگرەسىنە دەگەن سەنىمىن نىعايتتى. سودان بەرى بايقوڭىردان مىڭداعان جەر سەرىگى ۇشىرىلىپ, ونداعان ميسسييا ورىندالدى. مۇندا كورنەكتى عالىمدار, كونسترۋكتورلار مەن ينجەنەرلەر جۇمىس ىستەدى. ۇلى جەتىستىكتەردىڭ باستاۋىندا تۇرعان بارلىق مامانعا شەكسىز ريزاشىلىعىمدى بىلدىرەمىن! بىز الەمدەگى ەڭ ىرى عارىش ايلاعىنىڭ قازاق جەرىندە ورنالاسقانىن ەرەكشە ماقتان تۇتامىز. حالقىمىزدىڭ قاھارمان ۇلدارى توقتار اۋباكىروۆ, تالعات مۇساباەۆ جانە ايدىن ايىمبەتوۆ وسى ارادان كوسموسقا اتتاندى. ەلىمىز حالىقارالىق عارىشتى يگەرۋ ىسىنىڭ بەلسەندى مۇشەسى سانالادى.», – دەلىنگەن پرەزيدەنتتىڭ قۇتتىقتاۋىندا.

«بايقوڭىر» — الەمدىك عىلىم مەن تەحنيكا جەتىستىكتەرىنىڭ سيمۆولى. دال وسى جەردەن 1961 جىلى يۋريي گاگارين العاشقى بولىپ عارىشقا اتتانعان ەدى. سول كەزدەن باستاپ بايقوڭىر — جۇزدەگەن حالىقارالىق زىمىران مەن عىلىمي سپۋتنيكتەردىڭ ۇشۋ الاڭىنا اينالدى.

قازىرگى تاڭدا قازاقستان مەن رەسەي اراسىنداعى كەلىسىم بويىنشا بايقوڭىر كەشەنى بىرلەسىپ پايدالانىلىپ كەلەدى. سونىمەن قاتار ەل ۇكىمەتى وتاندىق عارىش سالاسىن دامىتۋ ۇشىن جاڭا جوبالار مەن باعدارلامالاردى ىسكە اسىرىپ جاتىر.

70 جىل ىشىندە بايقوڭىر تەك عارىش ايلاعى عانا ەمەس, عالامعا كوز تىككەن ادامزاتتىڭ ارمانىن جۇزەگە اسىرعان سيمۆولعا اينالدى.