Bügin adamzat tarihındağı twñğış ğarış aylağı — «Bayqoñırdıñ» qwrılğanına 70 jıl toldı. 1955 jılı irgetası qalanğan bwl nısan Qazaqstan ğana emes, bükil älem üşin mañızdı strategiyalıq jäne ğılımi keşen sanaladı, dep habarlaydı Shalqar.kz.

Mereytoy qarsañında Memleket basşısı Qasım-Jomart Toqaev Bayqoñır ğarış aylağınıñ qızmetkerleri men ardagerlerin käsibi merekemen qwttıqtadı.

«Barşañızdı «Bayqoñır» ğarış aylağınıñ qwrılğanına 70 jıl toluımen qwttıqtaymın! 1957 jılı däl osı aradan jasandı Jer serigi wşırılıp, ğarıştı igeru däuiri bastaldı. Köp wzamay, 1961 jılı aylaqtan twñğış ğarışker YUriy Gagarin kök jüzine attandı. Bwl tarihi oqiğa jahan jwrtşılığın biriktirip, adamzattıñ ğılım men örkeniet progresine degen senimin nığayttı. Sodan beri Bayqoñırdan mıñdağan Jer serigi wşırılıp, ondağan missiya orındaldı. Mwnda körnekti ğalımdar, konstruktorlar men injenerler jwmıs istedi. Wlı jetistikterdiñ bastauında twrğan barlıq mamanğa şeksiz rizaşılığımdı bildiremin! Biz älemdegi eñ iri ğarış aylağınıñ qazaq jerinde ornalasqanın erekşe maqtan twtamız. Halqımızdıñ qaharman wldarı Toqtar Äubäkirov, Talğat Mwsabaev jäne Aydın Ayımbetov osı aradan kosmosqa attandı. Elimiz halıqaralıq ğarıştı igeru isiniñ belsendi müşesi sanaladı.», – delingen Prezidenttiñ qwttıqtauında.

«Bayqoñır» — älemdik ğılım men tehnika jetistikteriniñ simvolı. Däl osı jerden 1961 jılı YUriy Gagarin alğaşqı bolıp ğarışqa attanğan edi. Sol kezden bastap Bayqoñır — jüzdegen halıqaralıq zımıran men ğılımi sputnikterdiñ wşu alañına aynaldı.

Qazirgi tañda Qazaqstan men Resey arasındağı kelisim boyınşa Bayqoñır keşeni birlesip paydalanılıp keledi. Sonımen qatar el ükimeti otandıq ğarış salasın damıtu üşin jaña jobalar men bağdarlamalardı iske asırıp jatır.

70 jıl işinde Bayqoñır tek ğarış aylağı ğana emes, ğalamğa köz tikken adamzattıñ armanın jüzege asırğan simvolğa aynaldı.