Қазақстанда дәрі-дәрмек бағасын қайта есептеу басталды. Денсаулық сақтау министрлігі дәрі-дәрмек бағасын белгілеу моделін өзгертіп, негізсіз үстемеақыларды алып тастау арқылы бағаны төмендетуді көздеп отыр, деп хабарлайды Shalqar.kz.

Бұл туралы Денсаулық сақтау вице-министрі Ержан Нұрлыбаев Орталық коммуникациялар қызметіндегі брифингте мәлімдеді.

“Дәрілерге баға белгілеу моделі өзгерді. Бұрын қосылған негізсіз үстеме бағалар алынып тасталды”, – деді вице-министр.

Ескі жүйеде дәрі-дәрмек бағасына маркетинг, тасымалдау, кедендік рәсімдеу және басқа да үстемақылар қосылатын. Жаңа модель бойынша тек бір ғана үстеме ақы есептелмек – өндірушінің зауыттағы бағасына қосылатын тікелей үстеме.

“Бұл жүйе тәжірибе жүзінде сыналды. Соның негізінде, 1 шілдеге дейін елімізде тіркелген барлық дәрі-дәрмек бағасы қайта есептеледі”, – деді Ержан Нұрлыбаев.

Жаңа жүйе нәтижесінде халық көп тұтынатын препараттар бағасы айтарлықтай төмендеуі мүмкін. Бұл әсіресе әлеуметтік аз қамтылған топтар мен созылмалы ауруға шалдыққан науқастар үшін тиімді болмақ.