وڭتۇستىك كورەيادا كەزەكتى پرەزيدەنت سايلاۋى ەلدىڭ بولاشاعىنا ۇلكەن بەتبۇرىس اكەلدى. وپپوزيتسييالىق دەموكراتييالىق پارتييانىڭ وكىلى لي چجە ميون جەڭىسكە جەتىپ, ەل تىزگىنىن قولىنا الدى, دەپ حابارلايدى Shalqar.kz.

جالپى حالىقتىڭ 79 پايىزدان استامى داۋىس بەرۋگە قاتىسقان, بۇل — 1997 جىلدان بەرگى ەڭ جوعارى كورسەتكىش. لي چجە ميون 48,8 پايىز داۋىس جيناپ, وز قارسىلاسى, بيلىكتەگى ازاماتتىق بيلىك پارتيياسىنىڭ ۇمىتكەرى كيم مۋن سۋدان باسىم تۇستى (42,1%).

سايلاۋ قورىتىندىسى جارييالانعان سوڭ لي چجە ميون العاشقى سوزىندە ەل ىشىندەگى ساياسي شيەلەنىستى توقتاتۋدى باستى مىندەت رەتىندە اتادى:
«سىز ماعان سەنىپ تاپسىرعان بىرىنشى ميسسيياڭىز — ازاماتتىق سوعىستى توقتاتۋ», — دەدى جاڭا پرەزيدەنت.

كيم مۋن سۋ جەڭىلگەنىن رەسمي تۇردە مويىنداپ, باسپاسوز ماسليحاتىن وتكىزدى.

61 جاستاعى لي چجە ميون تاياۋ كۇندەرى رەسمي تۇردە قىزمەتكە كىرىسىپ, ساياساتتان باستاپ مادەنيەتكە دەيىن بارلىق سالادا رەفورمالار جاساماق. ول ۇلتتىق اسسامبلەيادا سالتاناتتى تۇردە انت بەرەدى. بۇل جولعى ۇلىقتاۋ راسىمى قىسقا ارى رەسمي وتپەك — وتپەلى كەزەڭدىك كوميسسييا قۇرىلمايدى.

ساراپشىلار جاڭا پرەزيدەنتتىڭ العاشقى قادامدارى ەلدەگى ىشكى جانە سىرتقى ساياساتتا جاڭا لەپ اكەلەدى دەپ بولجايدى. سونىمەن قاتار, ول بيلەۋشى جانە وپپوزيتسييالىق پارتييالارمەن, سونداي-اق پارلامەنت سپيكەرىمەن كەلىسسوزدەر جۇرگىزەدى.