قىرعىزستاندا اعزا ترانسپلانتاتسيياسىنا قاتىستى جاڭا ەرەجە قابىلداندى. ەندى تىرى ادامنىڭ مۇشەسىن تەك ەڭ جاقىن تۋىستارى عانا بەرە الادى. بۇل تۋرالى ەلدىڭ مينيسترلەر كابينەتى بەكىتكەن ارنايى قۇجاتقا سۇيەنە وتىرىپ, دەپ حابارلايدى Shalqar.kz.

كىم دونور بولا الادى?

جاڭا ەرەجە بويىنشا دونور بولۋ قۇقىعى:
 • اتا-انالارعا,
 • كامەلەتكە تولعان بالالارعا,
 • اعا-ىنىلەر مەن اپكە-سىڭلىلەرگە,
 • اتاسى مەن اجەسىنە,
 • ارعى اتاسى مەن ارعى اجەسىنە بەرىلەدى.

ياعني, تەك تەگى ورتاق, زاڭ جۇزىندە راستالاتىن تۋىستار عانا دونور بولا الادى. بەيتانىس ادامنىڭ اعزاسىن الۋ مۇلدە تىيىم سالىنادى.

اعزا نەمەسە تىن اۋىستىرۋ وپەراتسيياسى تەك باسقا ەمدەۋ ادىستەرى تيىمسىز بولعان جاعدايدا عانا جاسالادى. ول ۇشىن ارنايى مەديتسينالىق قورىتىندى قاجەت. مۇنداي وپەراتسييانى تەك قىرعىزستانداعى بىرقاتار مەملەكەتتىك مەديتسينالىق مەكەمەلەردە عانا جاساۋعا رۇقسات ەتىلگەن. اتاپ ايتقاندا:
 • رەجەپ تايىپ ەردوعان اتىنداعى قىرعىز-تۇرىك دوستىعى اۋرۋحاناسى,
 • م.م.ماماكەەۆ اتىنداعى ۇلتتىق حيرۋرگييا ورتالىعى,
 • انا مەن بالا ۇلتتىق ورتالىعى,
 • وش مەملەكەتتىك ۋنيۆەرسيتەتىنىڭ مەديتسينالىق كلينيكاسى.

قۇجاتتا ترانسپلانتاتسييا تەك ەرىكتى جانە ماجبۇرلەۋسىز جۇرگىزىلۋى تيىس دەپ جازىلعان. ادام اعزاسىن ساتۋعا جانە ساتىپ الۋعا زاڭ جۇزىندە تىيىم سالىنادى.

بۇگىندە قىرعىزستاندا بۇيرەك, باۋىر جانە سۇيەك كەمىگىن (قان تۇزەتىن جاسۋشالار) ترانسپلانتاتسييالاۋ رۇقسات ەتىلگەن.