Алматы тұрғындары енді жарамсыз немесе қолданылмай қалған дәрілерін дұрыс әрі қауіпсіз түрде өткізе алады. Қаладағы 36 емханада арнайы контейнерлер орнатылып, дәрі-дәрмектерді кәдеге жарату жобасы іске қосылды, деп хабарлайды Shalqar.kz.

Мұндай бастама Алматы әкімдігі мен экологиялық ұйымдардың бірлескен жобасы ретінде жүзеге асуда. Мамандардың айтуынша, жарамдылық мерзімі өткен дәрілерді үйдегі қоқысқа тастау — қоршаған орта мен адам денсаулығына үлкен қауіп төндіреді.

«Дәрілер — бұл жай ғана қалдық емес. Олар — қауіпті заттар. Белсенді химиялық құрамдар топыраққа және суға түсіп, экожүйеге зиян келтіруі мүмкін», — делінген қалалық әкімдік хабарламасында.

Қандай дәрілерді өткізуге болады?

Контейнерлерге келесі заттарды салуға болады:
 • таблеткалар мен капсулалар,
 • майлар, гельдер, кремдер,
 • ампулалар мен сироптар,
 • сұйық дәрілер және ерітінділер.

Маңызды: инелер, шприцтер немесе қан жұққан медициналық қалдықтар қабылданбайды — олар басқа тәртіппен жойылады. Дәрілерді өткізер алдында тығыз пакетке салып, мықтап байлап апару қажет.

Контейнерлер орналасқан емханалар тізімі EcoNetwork.kz сайтында жарияланған.

Бұған дейін Мәжіліс депутаты Асхат Аймағамбетов еліміздің дәрі-дәрмекке тым тәуелді екенін, әсіресе импорттық өнімдердің көлемі шектен тыс көбейіп бара жатқанын айтқан еді.