قازاق بوكسىنداعى باستى ۇمىت, ورتا سالماقتاعى WBO چەمپيونى جانىبەك الىمحانۇلى 13 قىركۇيەكتە وتەتىن تاريحي بوكس كەشىندە وز ونەرىن كورسەتۋگە بەل بۋىپ وتىر. ونىڭ قارسىلاسى – WBC تۇجىرىمى بويىنشا الەم چەمپيونى كارلوس ادامەس. جەكپە-جەك وتۋى مۇمكىن الاڭ – لاس-ۆەگاس, ال باستى كەشتىڭ وزى – ساۋلь “كانەلو” الьۆارەس پەن تەرەنس كروۋفوردتىڭ كەزدەسۋى, دەپ حابارلايدى Shalqar.kz.

جانكۇيەرلەر الەۋمەتتىك جەلىلەردە الىمحانۇلى مەن ادامەس اراسىنداعى كەزدەسۋدى كانەلو مەن كروۋفوردتىڭ اندەركارتىندا كورۋدى قالايتىنىن جارىسا جازۋدا. جانىبەك تە بۇل ۇسىنىسقا قولداۋ بىلدىرىپ, رينگكە شىعۋعا ازىر ەكەنىن مالىمدەدى.

“الەۋمەتتىك جەلىدەگى جانكۇيەرلەردىڭ مەنىڭ ادامەسپەن جەكپە-جەگىمدى كانەلو مەن كروۋفوردتىڭ كەشىنە قوسۋدى سۇراپ جاتقانىن بايقادىم. مەن بۇل ۇسىنىستى تولىقتاي قولدايمىن. قۋانا كەلىسەمىن! رينگكە شىعۋعا دايىنمىن!” – دەپ جازدى ول وز پاراقشاسىندا.

بىر عانا جەكپە-جەكتە ۇش چەمپيوندىق بەلبەۋدىڭ تاعدىرى شەشىلۋى مۇمكىن:
 • جانىبەكتىڭ WBO تيتۋلى,
 • ادامەستىڭ WBC بەلبەۋى,
 • سونىمەن قاتار, WBA “سۋپەر” تيتۋلى دا وسى كەشتە يەسىن تابۋى ىقتيمال.

بۇل جاعداي كەزدەسۋدى جاي عانا باسەكە ەمەس, ورتا سالماقتاعى ەڭ ماڭىزدى بىرىكتىرۋشى جەكپە-جەكتەردىڭ قاتارىنا شىعارىپ وتىر.

ساۋلь الьۆارەس پەن تەرەنس كروۋفورد اراسىنداعى سۋپەرجەكپە-جەك 2025 جىلدىڭ باستى سپورت وقيعالارىنىڭ بىرىنە اينالماق. كەشتى ۇيىمداستىرۋشى – ساۋدييالىق ىقپالدى تۇلعا تۋركي ال-اش-شەيح, ول سوڭعى جىلدارى بوكس الەمىندەگى ەڭ ۇلكەن شوۋلاردىڭ ارتىندا تۇرعان ادام.

جانىبەك ۇشىن بۇل تەك بەلبەۋلەر عانا ەمەس – ابسوليۋت چەمپيون اتاعىنا بىر قادام. قازاق جانكۇيەرلەرى بۇل جەكپە-جەكتىڭ رەسمي جارييالانۋىن تاعاتسىزدانا كۇتۋدە.