Үндістанның Ахмедабад қаласынан Лондонға бет алған Air India әуе компаниясының рейсі аспанда ұзақ ұша алмады. 232 жолаушы мен 12 экипаж мүшесі отырған AI-171 рейсі ұшып шыққаннан көп ұзамай апатқа ұшырады. Алдын ала мәліметке сәйкес, ұшақ Мегханинагар ауданы маңында жерге құлаған, деп хабарлайды Shalqar.kz.

Оқиға орнында дүрбелең туындап, тұрғындар мен куәгерлер үрейге бөленді. Қазіргі уақытта құтқарушылар апат аймағында қарқынды іздестіру-құтқару жұмыстарын жүргізіп жатыр.

Ішкі істер министрі Амит Шах оқиғаға дереу араласып, Гуджарат штатының басшыларымен және Ахмедабад полициясымен тікелей байланысқа шықты. Ал Азаматтық авиация министрі Рам Мохан Найду жағдайды көзбен көріп, әрекеттерді үйлестіру үшін тікелей оқиға орнына жол тартты.

Ресми органдар жақын арада қосымша ақпарат береді деп күтілуде. Қазіргі таңда халық оқиғаның мән-жайына алаңдаулы.