كاناداداعى سولتۇستىك ونتاريو ورمانىندا ەرەكشە ارحەولوگييالىق جاڭالىق تىركەلدى – جارتاس بەتىندە رۋنا تاڭباسىمەن ويىلىپ جازىلعان كونە دۇعا تابىلدى. ماماندار بۇل جازۋدى الەمدە سيرەك كەزدەسەتىن جادىگەر دەپ وتىر, دەپ حابارلايدى Shalqar.kz.

وقيعا ورمان ىشىندەگى جارتاسقا الىپ اعاش قۇلاپ, ونىڭ استىنداعى جازۋدى اشىپ تاستاعاننان كەيىن بەلگىلى بولعان. مامانداردىڭ ايتۋىنشا, بۇل – سولتۇستىك امەريكا اۋماعىنان تابىلعان ەڭ ۇلكەن كولەمدەگى رۋنا جازۋى, ارى ول “وتچە ناش” دۇعاسىنىڭ تولىق نۇسقاسىن قامتيدى.

جاڭالىقتى ونتاريو ارحەولوگييالىق زەرتتەۋلەر جانە اعارتۋ ورتالىعى راستادى. ولار تاستىڭ ەنى 1,2 مەتر, ۇزىندىعى 1,5 مەتر ەكەنىن جانە وندا 255 رۋنا تاڭباسى مەن 14 بەلگى, سونىمەن قاتار قايىقتا وتىرعان 16 ادامنىڭ بەينەسى ويىلىپ سالىنعانىن حابارلادى.

جازۋ تورتبۇرىش تارىزدى قۇرىلىممەن بەدەرلەنگەن. تاستىڭ ماڭىزدىلىعىن انىقتاۋ ۇشىن ورتالىق الەمدەگى رۋنا جازۋى بويىنشا جەتەكشى مامان, شۆەتسيياداعى ۋپپسالا ۋنيۆەرسيتەتىنىڭ پروفەسسورى حەنريك ۋيلьيامستى ارنايى شاقىرتقان.

«بۇل – ناعىز رۋنا جازۋى. بىراق ول ۆيكينگ داۋىرىنە جاتپايدى. بۇل – XVI–XIX عاسىرلار ارالىعىندا شۆەتسييادا قولدانىلعان جازۋ تۇرى. جازۋدى شۆەد جازعان بولۋى مۇمكىن, بىراق ول ادام كاناداعا قالاي جانە قاشان كەلگەنى بەلگىسىز», – دەيدى پروفەسسور ۋيلьيامس.

زەرتتەۋشىلەر ەندى تاستىڭ شىعۋ تەگى مەن ونى ويىپ جازعان ادام تۋرالى ناقتى دەرەكتەر تابۋعا تىرىسىپ جاتىر.